Ijtimoiy tarmoqlarda Andijon viloyatidagi maktablarning birida o‘quvchilar dars paytida tik yoqda turgani ko‘ringan video tarqaldi. “Daryo” muxbirining aniqlashtirishicha, voqea viloyatning Asaka tumanidagi maktabda sodir bo‘lgan.
Viloyat xalq ta’limi boshqarmasi axborot xizmati rahbari Umarxo‘ja Madaminovning “Daryo”ga ma’lumot berishicha, holat tumandagi 28-umumta’lim maktabida ro‘y bergan.
Ijtimoiy tarmoqlarda tarqalgan videoda 28-umumta’lim maktabi o‘quvchilarining dars mashg‘ulotlarini yakunlab, to‘garak mashg‘ulotlarini o‘tayotgani tasvirlangan. Bu paytda ushbu xonada partalar almashayotgan bo‘lgan, holat esa tasvirga olingan. Videotasvirda esa xonada jihozlar yo‘qdek ko‘rinish hosil qilgan. Aslida ushbu ta’lim muassasasida parta va stol-stullar yetarli,— deydi Umarxo‘ja Madaminov.Mas’ulning ma’lumot berishicha, 28-maktab binosida ta’mirlash ishlari ketayotgani bois, bu maktab o‘quvchilari vaqtincha 29-maktab binosidan foydalanib turgan.
29-maktab 2019-yilda faoliyati tugatilgan Asaka oziq-ovqat kasb-hunar kolleji binosiga ko‘chirilgan. Bino 680 o‘ringa mo‘ljallangan bo‘lib, hozirda muassasada 528 nafar o‘quvchi tahsil olmoqda. O‘quv xonalari mebel, o‘quv laboratoriya asbob-uskunalari hamda sport anjomlari bilan to‘liq ta’minlangan. Prezidentimizning 2022-yil 18-martdagi “2022—2026-yillarda “Obod qishloq” va “Obod mahalla” dasturlarini amalga oshirish chora-tadbirlari to‘g‘risida” qaroriga asosan tumandagi 28-maktab “Obod qishloq” davlat dasturining kapital rekonstruksiya rejasiga kiritilgan.Dastur asosida maktabning mavjud 460 o‘rinli binosini mukammal ta’mirlash hamda qo‘shimcha 110 o‘rinli yangi o‘quv bino qurish rejalashtirilgan. Ayni paytda qurilish-ta’mirlash ishlari olib borilayotganligi sababli maktab o‘quvchilari yaqin atrofdagi ijtimoiy soha obyektlariga ko‘chirilgan. Jumladan, maktabning 428 nafar yuqori sinf o‘quvchilari tumandagi 29-sonli umumta’lim maktabiga ko‘chirilgan. Ular maktabning uchinchi qavatidagi foydalanilmasdan bo‘sh turgan xonalarda tahsilni davom ettirishmoqda. O‘qituvchi va o‘quvchilarga dars mashg‘ulotlari o‘tishlari uchun yetarli darajada sharoitlar yaratilib, zarur o‘quv jihozlari to‘liq ta’minlangan, — deydi u.
Izoh (0)