Rossiya Xavfsizlik kengashi kotibi Nikolay Patrushevning o‘g‘li, qishloq xo‘jalik vaziri Dmitriy Patrushev Vladimir Putin Rossiya prezidentligidan ketgan taqdirda, ushbu lavozimga da’vogarlik qilishi mumkin. Bu haqda The Washington Post siyosiy tahlilchilarga va Nikolay Patrushevga yaqin manbaga tayanib yozmoqda.
Gazeta qayd etishicha, oktabrda 45 yoshga to‘ladigan Dmitriy Patrushev Rossiya hokimiyatida avlodlar almashinuvi ishtirokchisiga aylanishi mumkin.
“U bir kunga bosh vazir bo‘lishi mumkin, ertasi kuni esa prezidentga aylanadi”, — dedi nashrning qishloq xo‘jalik vazirining otasiga yaqin manbasi. Gazeta suhbatdoshi qayd etishicha, Patrushev “bir nechta tillarda so‘zlasha oladi”, “yosh” va “urushda qatnashmagan”.
Muxolifatchi Aleksey Navalniyning erkin saylovlarda g‘olib bo‘lish ehtimoli bo‘lsa-da, tahlilchilar uni Putindan keyingi prezident sifatida ko‘rmayapti, deb yozadi The Washington Post. Bu Navalniy, Dmitriy Patrushevdan farqli o‘laroq, “elitalar dushmani” ekani bilan izohlandi. “Patrushev — tizim odami. Agar u: ‘mening pozitsiyam mana shunaqa, Federatsiya kengashi va Davlat dumasining yarmi men tomonda turibdi, kelinglar saylovlarni belgilaymiz’, — desa, u davlat pozitsiyasidan gapirayotgan bo‘ladi. Navalniy esa ko‘chadan kelgan odamdek gapiradi, xolos”, — deya tushuntirdi Nikolay Patrushevning sobiq maslakdoshi.
Putinning lavozimiga boshqa ehtimoliy da’vogarlar sifatida WP bosh vazir Mixail Mishustin, Moskva meri Sergey Sobyanin, prezident administratsiyasi rahbari o‘rinbosari Dmitriy Kozak, prezident sobiq qo‘riqchisi, Tula viloyati rahbari Aleksey Dyumin, shuningdek, Nikolay Patrushevni tilga oldi.
So‘nggi vaqtlarda jamoatchilik orasida faollashib, Mudofaa vazirligi va Bosh shtabni tanqid qilishni o‘ziga ep ko‘rayotgan Ramzan Qodirov va Yevgeniy Prigojinni tahlilchilar davlat rahbari lavozimiga haqiqiy da’vogarlar deb atamadi. Ular, katta ehtimol bilan, hokimiyat uchun emas, balki birinchi o‘rinda pul va nufuz uchun kurashmoqda, deya taxmin qildi ular.
Ta’kidlanishicha, Putinning prezident lavozimidan ayrilishi ehtimoli haqidagi muhokamalar Rossiyaning xalqaro maydonda yakkalab qo‘yilishi, shuningdek, frontdagi muvaffaqiyatsizliklardan ichki noroziliklar fonida kuchaygan.
“Hozirgi vaziyatdan to‘yib ketgan odamlar ko‘p, deb o‘ylayman. Ularning fikricha, Putinning yaroqlilik muddati tugagan”, — dedi London Universitet kolleji Slavyan va Sharqiy Yevropa tadqiqotlari maktabidan Mark Galetti. Uning ta’kidlashicha, Rossiyaning “pragmatik elitasi” hozircha Putinga qarshi chiqish xavflari “bosh egib” ishlashda davom etish xavflaridan yuqori deb hisoblaydi. “Putin hamon xavfsizlik apparatini nazorat qiladi, va bu, ehtimol, eng muhim omil, lekin u zaif”, — dedi ekspert.
Siyosatshunos Tatyana Stanovayaning fikricha, hokimiyatdagi o‘zgarishlarni oldindan taxmin qilish juda qiyin. “Agentura.ru” sayti bosh muharriri Andrey Soldatov aytishicha, u davomchilar masalasi muhokamasiga “shubha bilan yondashadi, chunki elita vakillari “g‘azablanyapti, to‘g‘ri, lekin bu ular harakatga o‘tishga tayyor degani emas”.
Iyul oyida The Washington Post Dmitriy Patrushevning otasi, Xavfsizlik kengashi kotibi Nikolay Patrushev Kremlda “harakatlantiruvchi kuch”ga aylanga, uning omma oldidagi nutqlari esa kelajakda Vladimir Putinning lavozimini egallash istagidan darak berishi mumkinligi haqida yozgandi.
Dmitriy Patrushev Qishloq xo‘jaligi vazirligiga 2018-yildan buyon rahbarlik qilmoqda. Ungacha sakkiz yil davomida “Rosselxozbank”ni boshqargan, shuningdek, VTBda katta vitse-prezident lavozimida ishlagan.
Izoh (0)