Andijon va Farg‘onada 4 mingga yaqin 1-sinf o‘quvchisining ryukzaklari boshqasiga almashtirib berildi
Andijon va Farg‘ona viloyatlaridagi bir nechta maktablarda 4 mingga yaqin birinchi sinf o‘quvchilarining prezident sovg‘asi sifatida tarqatilgan ryukzaklari boshqasiga almashtirib berildi. Bu haqda “Daryo” muxbiri xabar bermoqda.
Adliya vazirligi Intellektual mulk departamenti yetakchi maslahatchisi Murodjon Jaloliddinovning ma’lum qilishicha, ijtimoiy tarmoqlarda tarqalgan “1-sinfga borgan ayrim qizaloqlarga qop-qora ryukzaklar berildi” sarlavhali xabarlarda Andijon va Farg‘ona viloyatlarining bir nechta maktablarida birinchi sinf o‘quvchilari uchun prezident sovg‘asi sifatida tarqatilgan maktab sumkalarida Gucci, Fila, Nike kabi xorijiy brendlar logotipidan foydalanilgani qayd etilgan.
Ushbu holat yuzasidan Andijon viloyat adliya boshqarmasi Intellektual mulk huquqlarini himoya qilish bo‘limi tomonidan o‘rganish olib borilgan.O‘rganish davomida Baliqchi tumanida faoliyat yurituvchi “H.P.S.” xususiy korxonasiga tegishli ishlab chiqarish obyektlarida 2022-yilning iyul—avgust oylari davomida davlat ro‘yxatidan o‘tkazilgan Fila, Nike, Adidas, Gucci, Hello Kitty xorijiy tovar belgilariga o‘xshash bo‘lgan Fila, Nike, Adidas, Gucci, Hello Kitty nomli o‘quvchilar ryukzaklarini ishlab chiqarganligi hamda “O‘quv ta’lim-ta’minot” davlat muassasasining shartnomasiga asosan Andijon viloyatidagi umumta’lim maktablarining 1-sinf o‘quvchilariga tarqatilganligi aniqlangan.
Holat yuzasidan xususiy korxonaga nisbatan Andijon viloyati adliya boshqarmasi tomonidan o‘zganing tovar belgisi bo‘lgan va muhofaza qilinayotgan belgiga o‘xshash tovar belgilaridan noqonuniy foydalanganligi uchun ma’muriy bayonnoma rasmiylashtirilgan. Shuningdek, Ma’muriy javobgarlik to‘g‘risidagi kodeksning 177-moddasiga asosan ko‘rib chiqish uchun sudga yuborilgan.
Jinoyat ishlari bo‘yicha Baliqchi tuman sudining qaroriga muvofiq huquqbuzarga nisbatan bazaviy hisoblash miqdorining 15 baravari, ya’ni 4,5 million so‘m miqdorida jarima jazosi tayinlangan.
Shuningdek, Adliya vazirligining tegishli taqdimnomasiga asosan 3974 ta kontrafakt sumkalar o‘quvchilardan qaytarib olinib, yangi, sifatlisiga almashtirib berilgan.
Avvalroq Andijonda xorij brendlaridan foydalanib, ryukzak ishlab chiqargan tadbirkorga ma’muriy bayonnoma rasmiylashtirilgani haqida xabar berilgandi.
