Amerika razvedkasi Darya Duginaning o‘ldirib ketilishi ortida Ukraina turibdi deb hisoblaydi

Amerika maxsus xizmatlari taxmin qilishicha, rossiyalik faylasuf Aleksand Duginning qizi Daryaning o‘ldirib ketilishi Ukraina hukumatining ba’zi a’zolari bilan kelishilgan. Bu haqda The New York Times AQSH ma’muriyatidagi manbalariga tayanib xabar bermoqda.

Nashr manbalari da’vo qilishicha, Vashington Darya Duginaga nisbatan qotillikni uyushtirishda hech qanaqasiga ishtirok etmagan, shu jumladan, Kiyevga razvedka ma’lumotlarini taqdim etmagan. Ustiga-ustak, AQSH hukumati bu operatsiya haqida oldindan bilmagan ham, agar bilganida, uning amalga oshirilishiga qarshi chiqqan bo‘lardi, deya qo‘shimcha qildi manbalar.

Jo Bayden ma’muriyatidagilar xavotir bildirishicha, bunday hujumlar katta ramziy ahamiyatga ega bo‘lsa-da, jangovar harakatlarga bevosita ta’sir o‘tkazmaydi va Rossiya harbiylarini bunga javoban yuqori mansabli ukrain amaldorlariga qarshi suiqasdlar uyushtirishga gij-gijlashi mumkin, deb yozadi NYT.

Gazeta manbalari qayd etishicha, Dugina o‘ldirib ketilganidan keyin AQSH o‘z noroziligini Ukraina hukumatiga yetkazgan.

Kiyev Duginaning o‘limiga aloqadorligini bir necha marta rad etgandi. Xususan, bu haqda Zelenskiy ham gapirgandi.

Ukraina prezidenti ofisi rahbari maslahatchisi Mixail Podolyak The New York Times bilan suhbat chog‘ida shunday degan edi: “Qaysidir mamlakatda urush chog‘ida amalga oshirilgan har qanday qotillik ma’lum bir amaliy ahamiyatga ega bo‘lishi kerak. U taktik yoki strategik bo‘lgan muayyan maqsadni amalga oshirishi kerak. Duginlarga o‘xshaganlar Ukraina uchun taktik yoki strategik maqsad emas. Bizning Ukraina hududida boshqa nishonlarimiz bor, men Rossiya qo‘mondonligi vakillarini va xoinlarni nazarda tutyapman, ular bu yo‘nalishda ishlaydigan maxsus xizmatlarimiz xodimlari uchun qiymatga ega bo‘lishi mumkin, lekin bu aniq Dugina emas”.

Darya Dugina 20-avgust kuni Moskva viloyatida avtomobili portlab ketishi oqibatida halok bo‘lgandi. FXX da’vo qilishicha, qotillikni Ukraina maxsus xizmatlari uyushtirgan, uni Ukraina fuqarosi Natalya Vovk amalga oshirgan, tayyorgarlikda yana bir ukrainalik Bogdan Siganenko qatnashgan.

Darya Dugina — o‘z otasi, “rus dunyosi” rahnamolaridan biri Aleksandr Duginning izdoshi edi. U Rossiyaning hukumatparast OAVlarida sharhlovchi sifatida chiqish qilardi. Dugina Ukrainaga bostirib kirishni qo‘llab-quvvatlagan va urush chog‘ida Rossiya tomonidan egallangan hududlarga borgan.