O‘ndan ortiq davlatlardan mehmonlar, Fanlar akademiyasi prezidentining talabalar bilan muloqoti: Namangan xalqaro fizika forumiga mezbonlik qildi

Namanganda “Fizika – 2022” xalqaro forumi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.

Namangan muhandislik-texnologiya instituti tashabbusi bilan Fanlar akademiyasi, Oliy va o‘rta maxsus ta’lim vazirligi, viloyat hokimligi, Namangan muhandislik-qurilish instituti va Namangan davlat universiteti hamkorligida tashkillangan anjumanda fizika fanining bugungi kuni va kelgusidagi istiqbollari muhokama qilindi.

Tadbirda AQSh, Germaniya, Rossiya, Malayziya, Singapur, Belarus, Avstraliya, Fransiya, Italiya, Portugaliya, Hindiston, Xitoy, Janubiy Koreya, Zambiya, Qozog‘iston, Tojikiston va Qirg‘iziston kabi xorijiy davlatlarning nufuzli oliy o‘quv yurtlari rektorlari, akademiklar, professor va tadqiqotchilarning ma’ruzalari tinglandi, taqdimotlar o‘tkazildi.

Forum doirasida O‘zbekiston Fanlar akademiyasi prezidenti Behzod Yo‘ldoshevning yosh olimlar va iqtidorli talabalar bilan muloqoti bo‘lib o‘tdi. Ular akademikka o‘zlarini qiziqtirgan savollar bilan murojaat etdi, fizika fanini yanada rivojlantirish va ommalashtirish bilan bog‘liq takliflarini bildirdi.

Xalqaro forumda Namangandagi oliy o‘quv yurtlari O‘zbekiston Milliy universiteti huzuridagi yarim o‘tkazgichlar va mikroelektronika instituti, Fanlar akademiyasining Materialshunoslik hamda Fizika-texnika institutlari bilan hamkorlik shartnomalarini imzoladi.

Mavzuga doir: Fizika bo‘yicha 2022-yilgi Nobel mukofoti sovrindorlari e’lon qilindi