Finnair aviakompaniyasi Skandinaviya mamlakatlaridan O‘zbekistonga aviaqatnovlarni yo‘lga qo‘ymoqchi

Finnair aviakompaniyasi Skandinaviya mamlakatlaridan O‘zbekistonga aviaqatnovlarni yo‘lga qo‘ymoqchi. Bu haqda “Dunyo” AA xabar berdi.

Ta’kidlanishicha, ushbu masala O‘zbekiston Transport vazirligi, mamlakatning Latviyadagi elchixonasi, Investitsiyalar va tashqi savdo vaziriligi mas’ullari, Uzbekistan Airports AJ hamda Finlyandiyaning Finnair aviakompaniyasi vakillari ishtirokida bugun videokonferensaloqa shaklida o‘tkazilgan uchrashuvda muhokama etilgan.

Uchrashuvda Finnair aviakompaniyasining davlat organlari bilan aloqalar departamenti direktori T.Koskinen Skandinaviya mamlakatlaridan O‘zbekistonga kelish istagida bo‘lgan sayyohlar uchun to‘g‘ridan to‘g‘ri aviaqatnovlarni yo‘lga qo‘yish istiqbollarini muhokama etib, ushbu yo‘nalishdagi aviakompaniya rejalari bilan o‘rtoqlashdi.

Aviakompaniya yo‘lovchi tashuvlarini Uzbekistan Airways bilan “kod-sher” tijoriy kelishuvlari asosida amalga oshirish, shuningdek, yuk tashuvlari yo‘nalishida ham reyslarni amalga oshirishga qiziqish bildirayotganligini ma’lum qildi. Muloqot davomida mamlakatga xorijiy aviakompaniyalarni jalb etish orqali parvozlar geografiyasini kengaytirish natijasida sayyohlarga qo‘shimcha qulayliklar yaratish borasida olib borilayotgan ishlar to‘g‘risida batafsil so‘zlab berildi.

Transport vaziriligi vakillari xorijiy aviakompaniyalarning O‘zbekistonga yangi reyslarni yo‘lga qo‘yish borasidagi takliflarini to‘liq qo‘llab-quvvatlashini ta’kidladi. Uchrashuv yakunida tomonlar muhokama qilingan hamkorlik yo‘nalishlari doirasida kelgusida amalga oshiriladigan vazifalarni belgilab oldi.

Skandinaviya Shimoliy Yevropa mamlakatlari tomonidan shakllangan geografiyadir. Skandinaviya mamlakatlariga Daniya, Shvetsiya va Norvegiya kabi davlatlar kiradi. Bu davlatlar bilan bir qatorda, Skandinaviyani Finlyandiya, Islandiya, Grenlandiya va ayrim orollar tashkil etadi.