“Ba’zida o‘zim ham noto‘g‘ri parkovka qilaman” — Rasul Kusherbayev

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda yangi — “Mahalla. Muammo. Mulohaza” loyihasini boshladi. Ko‘rsatuvning 1-soni mehmoni bo‘lgan Rasul Kusherbayev avtoturargohlar masalasidagi muammolarga to‘xtalib, o‘zi ham ba’zi paytlarda qoidalarni chetlab o‘tishga majbur bo‘layotgani haqida gapirdi.

Suhbat davomida Toshkent shahar hokimligining Jamoatchilik kengashi raisi Furqat Mahmudxo'jayev Oliy Majlis Qonunchilik palatasi deputatidan “Siz ham mashinangizni parkovkaga qo‘yasizmi? Endi sizni hamma taniydi, joy berishsa kerak?”, qabilida savol bergan.

Rasul Kusherbayevning javobi quyidagicha:

Yo‘q-yo‘q, unaqa holat bo‘lmagan. Ba’zida men ham noto‘g‘ri qo‘yaman mashinani. Ilojsiz paytda podyezd tagiga qo‘yaman. Nafaqat men, ko‘pchiligimiz shunday qilamiz. Boshqa iloji yo‘q, qayerda bo‘sh joy bo‘lsa, o‘sha yerga qo‘yib kelaman. Ba’zan chizib ketishadi. Chidaymiz-da endi, qo‘limiz bilan ko‘tarib yurolmaymiz.