Buxoro viloyatining G‘ijduvon tumanida qo‘shmachilik qilib munosib xulq-atvorda bo‘lish to‘g‘risida tilxat ehtiyot chorasi qo‘llanilgan ayolga ushbu jinoyatni takroran sodir etgani uchun 2 yilu 8 oy muddatga ozodlikni cheklash jazosi tayinlandi. Bu haqda “Daryo”ga Jinoyat ishlari bo‘yicha G‘ijduvon tumani sudi sudyasi Boborahim Ochilov xabar berdi.
Sud hujjatlariga ko‘ra, asli Qashqadaryo viloyatining Chiroqchi tumanida tug‘ilgan 38 yoshli ayol S.B. ayni paytda o‘zi yashab kelayotgan G‘ijduvon tumanidagi “Sharq” mahallasida joylashgan ko‘p qavatli uyining yotoqxonasida qo‘shmachilik jinoyatini sodir etgan. U hamqishlog‘i M.M.ga ishqiy munosabatda bo‘lishi uchun ayol topib berishini va buning evaziga undan o‘z plastik kartasiga 200 ming so‘m pul o‘tkazib berishini so‘ragan.S.B. fohishaxona saqlash va qo‘shmachilik jinoyatlarini sodir qilish xatti-harakatini davom ettirgan holda o‘ziga avvaldan tanish bo‘lgan 27 yoshli ayol M.J.ga M.M. bilan jinsiy aloqa qilishi uchun qulay sharoit yaratib bergan. O‘zi esa uyining oshxonasida kutib turgan.
Oradan chamasi ikki soatlarcha vaqt o‘tgan. M.J. fuqaro M.M.dan “o‘z xizmati” evaziga 100 ming so‘m undirgan. Shundan so‘ng M.M. bilan birga S.B.ning yashash uyidan chiqib ketayotgan vaqtda, ayolning qaynukasi A.A. podyezdning oldida ular bilan to‘qnash kelib qolgan. Sarosimada qolgan ayol ma’shuqasi bilan Matiz rusumli yo‘nalishli taksida voqea joyidan qochib ketishga uringan. Biroq qaynuka ularni ushlab olgan. U oldindan S.B.ning qanday ayol ekani haqida bilgani uchun ham akasining xotinini so‘roqqa tutgan. Ayol qaynukasiga uydagi pichoqlarni ustaxonaga olib borish uchun yo‘l-yo‘lakay S.B.ning uyiga kirib o‘tayotganini bildirgan. Bu orada fuqaro M.M. ketib qolgan. A.A. esa M.J.ni ushlab turib, onasi va akasiga qo‘ng‘iroq qilgan va ularning zudlik bilan voqea joyiga yetib kelishlarini so‘ragan.
“S.B. avval ham qo‘shmachilik jinoyatini sodir etgan. Shuningdek, M.J.ning qaynonasi uni nojo‘ya so‘zlar bilan haqorat qilgani uchun uni ham urgan. Sud tibbiy ekspertizasining xulosasiga ko‘ra, ayolda peshona, ikkala qosh, burun qirrasi, o‘ng lunj sohasidagi qontalash kabi sog‘lig‘ining qisqa muddat yomonlashuviga olib kelgan yengil tan jarohati qayd etilgan. Hodisa joyida bo‘lgan A.A.ni nojo‘ya so‘zlar bilan haqorat qilgan. Bundan tashqari, oshxona pichog‘i ularni o‘ldirib yuborishini aytib, baqir-chaqir qilgan”, — deydi sudya Boborahim Ochilov.
Sudda S.B. o‘z xatti-harakatlarini tan olmagan. So‘roq qilingan M.M. esa S.B.ning unga qo‘ng‘iroq qilib, jinsiy aloqa qilishi uchun qiz topganini, buning uchun uning plastik kartasiga 200 ming so‘m miqdorida pul tashlab berganini bildirgan.
“Sudlanuvchi S.B. holat ochiqlangach, o‘z aybiga to‘liq iqrorlik bildirdi. U Jinoyat kodeksi 131-moddasining 2-qismi (qo‘shmachilik qilish yoki fohishaxona saqlash) va 277-moddasi 2-qismining ‘v’ bandi (bezorilik)da ko‘rsatilgan jinoyatlarini sodir qilganlikda aybli deb topildi. Bundan tashqari, uning xatti-harakatlariga Jinoyat kodeksining 59-moddasi, ya’ni bir nechta jinoyat sodir etganlik uchun tartibida tayinlangan jazolarni qisman qo‘shish yo‘li bilan 2 yil 8 oy muddatga ozodlikni cheklash jazosi qo‘llanildi”, — dedi Boborahim Ochilov.
Izoh (0)