Zamonaviy uskunaning dastlabki mahsulotlari olindi
Olmaliq kon metallurgiya kombinatida jadal sur’atlarda olib borilayotgan “Yoshlik-1 konini o‘zlashtirish” investitsiyaviy loyihasi asosida ishlab chiqarish quvvatlari bir necha barobarga oshirilishi kutilmoqda. Shu bois oshirilgan quvvatlarni mahalliy texnologik uskunalar, ehtiyot va butlovchi qismlar bilan to‘liq ta’minlash uchun kombinat tarkibidagi Markaziy ta’mirlash mexanika zavodiga zamonaviy texnologik uskunalar olib kelinmoqda.
Xususan, joriy yilning yanvar oyida mazkur zavodning mexanik-yig‘uv sexining kon-shaxta uskunalari tayyorlash uchastkasiga Germaniya davlatidan Gleason P2000 tishli frezer uskunasi olib kelib o‘rnatildi. Iyun oyida esa Gleason P8000 foydalanishga topshirildi. Shuningdek, uchastkaga AXIOM 900 tokarlik vint kesuvchi uskunasi ham o‘rnatildi.
Yangi uskunalarda avgust oyida 4 dona shesternya (Fabrikalardagi ruda maydalash tegirmonlarining asosiy ehtiyot qismi) kabi mahsulot ishlab chiqarilishiga erishildi. Ushbu mahsulotlar Mis boyitish fabrikasi hamda Rux zavodiga yetkazib berildi. O‘rta Osiyoda yagona bo‘lgan bu uskuna 3 metrdan 8 metrgacha bo‘lgan tegirmon chambar (venets)larining tishini ochish imkoniga ega. Eng qulay tomoni mahsulotni tezkorlikda va sifat yuqori tarzda tayyorlab beradi.
Ushbu uskunalarning afzalliklari — ular to‘liq avtomatlashtirilgan, mahsulot ishlab chiqarishdagi vaqt sarfi ham to‘rt baravarga kamaygan. Ahamiyatlisi, ushbu mahsulotlar avvallari katta mablag‘ evaziga xorijdan keltirilgan bo‘lib, mahsulotning sexda ishlab chiqarilishi natijasida har bir val shestirnyasining narxi 3 baravar arzonga tushmoqda.
Texnologik uskunalarning ishlash jarayoni, sozlamalari onlayn tarzda kuzatib boriladi.
2022-yilda Markaziy ta’mirlash mexanika zavodida 208 mlrd so‘mlik 97 xil turdagi mahalliylashtirilgan mahsulotlar ishlab chiqarish ko‘zda tutilgan.
Ayni kunlarda dastur doirasida 57 turdagi mahsulotlar ishlab chiqarilmoqda. Dasturga ko‘ra, bir qator yangi mahsulotlarni ham ishlab chiqarish o‘zlashtirilgan. Jumladan, BelAZ avtogigantlari uchun SHSL sharnirli podshipniklar, modul 28Z43 tish botiqli val shesternyalari, KMD-2200 T1 D1M hamda KSD2200 Gr D1M maydalash uskunalariga zirhlar ishlab chiqarilmoqda.
