Ukrainaning NATOga tezlashtirilgan tartibda qo‘shilishiga to‘siq bo‘ladigan sabab ma’lum qilindi

Ukrainaning NATOga kirishi jarayoni kamida bir necha oy yoki hatto bir necha yil davom etishi mumkin, deb yozadi The New York Times gazetasi ekspertlarga tayanib.

NATO “ochiq eshiklar siyosati”ni olib borsa-da Ukrainada harbiy harakatlar davom etayotgan bir paytda, blok uning qo‘shilishiga ruxsat berishi dargumon, deyiladi maqolada.

AQSH rasmiylarining va’da qilishicha, Vashington Kiyevning NATOga qo‘shilishga bo‘lgan intilishlariga xalal bermaydi. Shu bilan birga, AQSH va Yevropa ittifoqchilari Rossiya bilan munosabatlarning keskinlashuvidan xavotirda. Gazetaga intervyu bergan tahlilchilarning aytishicha, AQSH prezidenti Jo Bayden “ilgari Ukrainaning alyansga a’zo bo‘lishini qo‘llab-quvvatlashni istamagan”.

“Bu (Ukrainaning NATOga kirishi) vaqt talab etadi. Unga qadar Ukraina o‘z ittifoqchilaridan qat’iy xavfsizlik kafolatlariga muhtoj”, — deydi alyans sobiq bosh kotibi Anders Fog Rasmussen.

Ukraina prezidenti Vladimir Zelenskiy mamlakat hududlarining Rossiya tomonidan anneksiya qilinishi fonida tezlashtirilgan tartibda NATOga a’zo bo‘lish uchun ariza topshirgan edi. Uning so‘zlariga ko‘ra, Kiyev va NATO allaqachon “de-fakto ittifoqchilar”, ammo bu maqom hujjatlashtirilishi kerak. Jarayon davomida Ukraina o‘zi uchun xavfsizlik kafolatlari bo‘yicha muzokaralar olib borish niyatida.

NATO bosh kotibi Yens Stoltenberg Ukrainaning alyansga qo‘shilish haqidagi arizasiga izoh berar ekan, NATOga a’zolik to‘g‘risidagi qaror 30 davlatning barchasi tomonidan qabul qilinishi kerakligini, hozirda alyans Ukrainaga Rossiyaning shafqatsiz bosqinidan o‘zini himoya qilish uchun tezkor yordam berishga e’tibor qaratayotganini aytdi.

Oq uy jarayonni boshqa vaqtda muhokama qilish kerak, deb hisoblamoqda.

Yevropaning 9 mamlakati — Polsha, Chexiya, Estoniya, Latviya, Litva, Shimoliy Makedoniya, Chernogoriya, Ruminiya va Slovakiya Ukrainaning NATOga qo‘shilishini qo‘llab-quvvatlab chiqdi.