O‘zbekistonda chorvachilik tarmog‘iga Jahon bankining 300 mln dollar imtiyozli krediti ajratiladi. Bu haqda Veterinariya va chorvachilikni rivojlantirish davlat qo‘mitasi raisi va Jahon bankining Yevropa va Osiyo mintaqasi qishloq xo‘jaligi hamda oziq-ovqat masalalari bo‘yicha bo‘limi rahbari o‘rtasida bo‘lib o‘tgan uchrashuvda ma’lum qilindi.
Qayd etilishicha, Jahon banki ishtirokidagi “O‘zbekistonda chorvachilik sohasini rivojlantirishning ikkinchi bosqich loyihasi”ning umumiy qiymati 300 mln dollarni tashkil etadi.
Loyihani tayyorlash ishlari dekabr oyida yakuniga yetadi va yil oxiriga qadar dastlabki kelishuv ishlari amalga oshiriladi.
Ayni paytda rejalashtirilgan loyiha doirasida infratuzilmani rivojlantirish bo‘yicha chorvachilik majmualarini “foydalanishga tayyor holda” tashkil etish va majmualarni lizing shartlari asosida xususiy sektorga o‘tkazish bo‘yicha chora-tadbirlar amalga oshirilmoqda.
Shuningdek, ushbu yondashuv asosida tadbirkorlarga yer ajratish masalalarini hal etish, ulardan garov ta’minotini talab qilmaslik va iqlim talablariga mos zamonaviy chorvachilik majmualarini tashkil etish bo‘yicha qo‘mita mutaxassislari taklifi taqdim etildi.
Jahon banki hamkorligida amalga oshirilayotgan “O‘zbekistonda chorvachilik sohasini rivojlantirish loyihasining birinchi bosqichi”da mazkur xalqaro moliya institutining imtiyozli mablag‘lari hisobiga O‘zbekistonning chorvachilik va uning tarmoqlarida qariyb yuz mingga yaqin yangi ish o‘rni yaratilgan.
Izoh (0)