Braziliyaliklar birinchi bosqichda prezidentni saylay olmadi, deb yozadi “RBK” mamlakat Oliy saylov sudiga tayanib.
Ikkinchi bosqichga amaldagi davlat rahbari, Liberal partiya yetakchisi Jair Bolsonaru va “Braziliya umid federatsiyasi” sotsialistik koalitsiya tomonidan ilgari surilgan sobiq prezident Luis Inasiu Lula da Silva (2003—2010-yillar) o‘tdi.
Saylov byulletenlarining 97,77 foizi hisoblab chiqilganidan keyin ma’lum bo‘lishicha, Bolsonaru ovozlarning 43,59 foizini, uning raqibi esa 47,98 foizini to‘plagan.
Nomzodlardan hech biri ovozlarning yarmidan ko‘pini yig‘ishga muvaffaq bo‘lmagani uchun, 30-oktabr kuni saylovlarning ikkinchi bosqichi o‘tkaziladi.
Saylovda jami to‘qqiz nomzod qatnashmoqda, boshqalar katta farq bilan orqada qolmoqda. Yetti kishi 1 foiz ham ovoz to‘play olmadi.
2018-yil 28-oktabrda bo‘lib o‘tgan avvalgi saylovlarda Bolsonaru 55,54 foiz ovoz yig‘ib g‘olib bo‘lgandi. U 2019-yil yanvaridan buyon mamlakatga rahbarlik qilib keladi. Bolsonaru konservativ Sotsial-liberal partiya vakili bo‘lib, o‘zining o‘ta o‘ng va populistik qarashlari bilan tanilgan.
Lula da Silva 2016-yilda Petrobas ishi bo‘yicha sudlanib, 12 yilga qamalgandi. Ammo apellyatsiya huquqidan foydalanib, 2018-yil apreligacha ozodlikda qoldi, shundan keyin sud hukmni bekor qilishdan bosh tortib, sobiq prezidentni hibsga jo‘natdi. 2018-yil avgustida mehnatkashlar partiyasi uni prezidentlikka nomzod sifatida ilgari surdi, biroq Oliy saylov sudi uni ro‘yxatga olishni rad etdi.
Izoh (0)