Futbol bo‘yicha Indoneziya chempionatining 11-turidan o‘rin olgan “Arema” — “Persebaya” uchrashuvida (2:3) fojia yuz berdi.
Malangadagi “Kanjuruhan” stadionida o‘tgan derbi vaqtidagi tartibsizliklar oqibatida 127 kishi halok bo‘lgan, deya xabar qilmoqda “Sport-Ekspress”.
O‘yin yakunlanganini bildiruvchi hushtakdan so‘ng xavfsizlik xizmati “Persebaya” futbolchilarini maydondan olib chiqib ketgan. Muxlislar maydonga chiqib kelgan, ishqibozlar va politsiya o‘rtasida janjal kelib chiqqan.
Muxlislar xavfsizlik xizmati vakillariga qarata turli buyumlarni uloqtirgan, bunga politsiya “dubinka” va ko‘zdan yosh oqizuvchi gazdan foydalanish bilan javob bergan.
Bu olomon ichida vahima keltirib chiqargan, muxlislar qochishni boshlagan va shu bois tiqilinchliklar yuzaga kelgan. Ko‘plab muxlis hushini yo‘qotgan va olomonning oyoq ostida qolgan.
Qayd etilishicha, ko‘plab odam gaz tufayli nafas olishda muammoga duch kelgan, “Arema” futbolchilari esa hushini yo‘qotgan shaxslarni maydondan olib chiqishga yordam bergan.
Voqea tufayli Indoneziya chempionatining 11-tur o‘yinlari qoldirilgan. Mamlakat futbol assotsiatsiyasi esa “Arema”ga mavsum yakuniga qadar o‘z maydonida o‘yin o‘tkazishni taqiqlagan.
Izoh (0)