Toshkent—Samarqand tezyurar poyezd yo‘li bo‘ylab 629 ta arzon uy-joy qurilishi ma’lum qilindi

Toshkent—Samarqand tezyurar poyezdining Toshkent viloyati hududidan o‘tgan qismida 629 ta arzon uy-joy quriladi. Bu haqda Toshkent viloyati hokimligi axborot xizmati tashabbusi bilan tashkil etilgan press-turda ma’lum qilindi, deya xabar berdi “Daryo” muxbiri.

Viloyat hokimligi axborot xizmati respublikada faoliyat yurituvchi OAV vakillari va blogerlar uchun noodatiy press-tur tashkil etib, Vazirlar Mahkamasining Toshkent—Samarqand tezyurar temiryo‘li uchastkasi bo‘ylab joylashgan aholi punktlari arxitektura qiyofasini yaxshilash va bu yerga tutash hududlarni obodonlashtirish bo‘yicha chora-tadbirlar to‘g‘risidagi qarori ijrosini ta’minlash borasida qilinayotgan ishlar haqida ma’lumot berdi.

Ta’kidlanishicha, qarorga ko‘ra Toshkent—Samarqand tezyurar temiryo‘li yoqasida joylashgan aholi punktlarining arxitekturaviy qiyofasini yaxshilash bo‘yicha, Toshkent shahri, Toshkent, Sirdaryo, Jizzax va Samarqand viloyatlaridagi uchastkalar bo‘ylab joylashgan hududlarda ko‘plab ishlar amalga oshirilgan. Bugunga qadar 3078 ta uy rekonstruksiya va kapital ta’mirlanib, ularning tomlari almashtirilgan. Old qismlari ta’mirlanib, devor o‘rnatilgan.

Mazkur maqsadlar uchun 33,7 milliard so‘m ajratildi. Bundan tashqari, Toshkent — Samarqand tez yurar temiryo‘li uchastkasi yoqasi bo‘ylab namunaviy loyihalar bo‘yicha 629 ta arzon uy-joy qurilishi ko‘zda tutilgan. Ular uchun 79,1 milliard so‘m mablag‘ sarf etilmoqda”, — deydi viloyat hokimligi axborot xizmati xodimi Asqar Ismoilov.

Ta’kidlanishicha, Toshkent viloyatining Zangiota, Yangiyo‘l, Chinoz tumanlari hamda Yangiyo‘l shahrida temir yo‘li bo‘ylab joylashgan aholi punktlarining arxitektura qiyofasini yaxshilash va unga tutash hududlarni obodonlashtirish maqsadida kompleks chora-tadbirlar ham amalga oshirilgan. Mazkur ishlar uchun 5,5 milliard so‘m mablag‘ sarflangan.

Temiryo‘l bo‘ylab jami 12 ta noqonuniy turar va noturar joylardan 10 tasi buzilib, 247 ta turar joy va tashkilot binolarining tom qismi ta’mirlandi, 13 ming 550 metr devorlar qayta ta’mirlanib, 19 ming 900 metr devorlarga rang berildi hamda 7 ming 523 metr past devorlar ko‘tarildi. 697 ta binolar ta’mirlanib, 501 tasining fasad qismiga rang berildi hamda 47 ta mahalladagi 11 ming 450 metr zovur, ariq va lotoklartozalandi.

Shuningdek, mahalla hududlaridagi 75 ta simyog‘ochlar hamda 2 ta ko‘prik bo‘yalib, ta’mirlandi. 43 ming 850 ta daraxt ko‘chati ekilib, oqlandi. 46 ta hududlardagi 46,1 gektar yer maydoni ko‘kalamzorlashtirildi.

Ushbu uchastkalarda temiryo‘l atrofiga o‘rnatilgan 2,65 kilometr panjaralar, xususan, temiryo‘l atrofidagi 9,5 kilometr yo‘l ta’mirlandi”, — deydi mas’ul.