Nukus garnizonida Shimoli-g‘arbiy harbiy okrug qo‘shinlari qo‘mondonligi boshqaruv apparati, harbiy qism komandirlari va muassasa boshliqlari hamda hamkorlikdagi kuch tuzilmalari vakillari bilan ko‘p darajali ikki tomonlama qo‘mondonlik-shtab harbiy o‘yini bo‘lib o‘tdi. Bu haqda okrug matbuot xizmati “Daryo”ga ma’lum qildi.
Harbiy boshqaruv organlarining mansabdor shaxslarini jangovar shaylikning yuqori darajalariga keltirganda vazifalarni bajarishga o‘rgatish, harbiy operatsiyalarga tayyorgarlik ko‘rish va o‘tkazishda qo‘shinlarni boshqarish bo‘yicha ofitserlarning ko‘nikmalarini nazoratdan o‘tkazish, boshqaruv organlari ishida harakatlarning hamjihatligiga erishish, o‘zaro yordam va bir-birini almashtira olish munosabatlarini o‘rnatish kabi maqsadlarni mujassam etgan mazkur harbiy o‘yin to‘rt bosqichda tashkil etildi.
Barcha toifadagi ofitserlarning kasbiy malakasini oshirish, ularda yuqori axloqiy-ruhiy sifatlarni va jangovar ruhni yuksaltirish, operativ san’at sirlarini o‘rgatish va strategik fikrlash qobiliyatini shakllantirishga xizmat qilgan va 15 kun davom etgan harbiy o‘yinlarda shartli ravishda mudofaa va hujum jangi o‘ynalib, tomonlarga belgilab berilgan hududlarda qo‘shin tarkibi bilan operatsiyalarni tayyorlash amalga oshirildi.
Ikki qarama-qarshi tomonning shartli ravishda xaritalarda jang olib boriladigan qo‘mondonlik-shtab harbiy o‘yini davomida zamonaviy qurolli to‘qnashuvlar va harbiy harakatlar tahlili asosida olingan ilg‘or tajribalar, yuzaga kelishi mumkin bo‘lgan nostandart vaziyatlar va qarama-qarshi kuchlarning ehtimoliy harakatlari har tomonlama qo‘llandi.
Shartli ravishda jangovar vazifalarni olgan o‘rganuvchilarning vaziyatga to‘g‘ri baho bergan holda asoslangan qarorlarni berishi, ularning zamonaviy janglar va qurolli mojarolar ehtimoliy tavsifi, amaldagi jangovar nizomlarga mos kelishi tekshirib borildi.
Har bir bo‘linma komandiri qo‘shin turlari va maxsus qo‘shinlarni mohirona qo‘llash, shikast yetkazuvchi vositalarning to‘g‘ri qo‘llangani, qo‘shinlarning harakati va jangda erishilgan yutuq va yo‘qotishlari, kun davomida qo‘yilgan topshiriqlarning bajarilishi va samaradorligi, ularni bajarish jarayonida shaxsiy tarkibning ma’naviy-ruhiy holati, uyushqoqligi va ijrochilik saviyasi, harbiy intizom darajasi bo‘yicha kunlik hisobotlari tinglandi.
Qo‘mondonlik-shtab harbiy o‘yinida qo‘shinlarning jangovar harakatlarni samarali tashkillashtirishi va har tomonlama ta’minoti bo‘yicha shtablar, qo‘shin turi, maxsus qo‘shinlar va xizmat turi boshliqlarining faoliyati, ishtirokchilar tomonidan ishlab chiqilgan jangovar-xizmat hujjatlari tekshirib borildi. Texnik va frontorti ta’minoti organlari, ularga bo‘ysunuvchi qo‘shilma, harbiy qism va bo‘linmalarning harakati, qo‘shinlarning ta’minot masalalarida paydo bo‘lishi mumkin bo‘lgan uzilishlarni bartaraf etish qobiliyati sinovdan o‘tkazildi.
Har bir bo‘linma komandiri vaziyatdan kelib chiqib qabul qilgan qarorini hamda bo‘linmalarga berilgan jangovar buyruq va farmoyishlarni asoslab, ish tartiblari, ishlab chiqilgan asosiy rejalashtirish, direktiv-farmoyish va hisobot hujjatlari o‘quv rahbariyati tomonidan tahlil qilindi.
Tahlil yakunlari bo‘yicha harbiy o‘yinda ishtirok etgan boshqaruv organlari va bo‘linma komandirlarining jang olib borish san’ati, bo‘linmalarni boshqarish va yuklatilgan vazifalarni bajara olish qobiliyati, qo‘shinlarni strategik qo‘llash bo‘yicha bilimlari baholandi.
Mazkur qo‘mondonlik-shtab harbiy o‘yinining ahamiyati hamda o‘rganuvchilarda jangni rejalashtirishda operativ va taktik hisob-kitoblarni ishlab chiqish ko‘nikmalarini oshishiga qo‘shgan hissasi inobatga olinib, yakunda bu kabi o‘quvlarni yana o‘tkazishga qaror qabul qilindi.
Izoh (0)