Ijtimoiy tarmoqlarda “Samarqand shahrida sog‘lom archalar kesib ketilmoqda!” mazmunida xabar tarqalgandi. Davlat ekologiya qo‘mitasi matbuot xizmati holat yuzasidan ma’lumot berdi.
Ta’kidlanishicha, holat bo‘yicha o‘tkazilgan o‘rganishlar davomida “Samarqand avtotexxizmat” MCHJ binosi ro‘parasida yo‘l ta’mirlash ishlari olib borish jarayonida 5 tup eldor qarag‘ayi daraxti fuqaro A.L. tomonidan noqonuniy ravishda kesib olib ketilgani aniqlangan. Ushbu fuqaro boshqaruvidagi avtotransport vositasi esa “Samarqand avtotexxizmat” MCHJga tegishli ekani ma’lum bo‘lgan.
Biroq MJCH mas’ullari bu huquqbuzarlik holatidan bexabar ekani, huquqbuzarlik holati fuqaro A.L. tomonidan sodir etilganini ma’lum qilgan.
Mazkur holat yuzasidan fuqaroga nisbatan tegishli tartibda Ma’muriy javobgarlik to‘g‘risidagi kodeksning 79-moddasi 1-qismi (o‘simlik dunyosi obyektlarini yig‘ish, tayyorlash va ulardan foydalanish tartibi hamda shartlarini buzish)ga muvofiq ma’muriy jarima hamda 86,4 million so‘m miqdorida o‘simlik dunyosiga yetkazilgan zarar bo‘yicha da’vo belgilandi. Hozirda hujjatlar sud organlariga taqdim etish uchun tayyorlanmoqda.
Izoh (0)