Qozog‘iston Rossiyaga harbiy texnika yuborayotgani haqidagi xabarlar yuzasidan mamlakat Mudofaa vazirligi izoh berdi

Qozog‘iston Mudofaa vazirligi, go‘yoki, Rossiyaga harbiy texnika yuborilayotgani aks etgan video yuzasidan izoh berdi, deb yozadi Tengrinews.

Ijtimoiy tarmoqlarda harbiy texnika kolonnasi yurib borayotgani ko‘rsatilgan videolar tarqalmoqda. Unga yozilgan izohda ushbu kolonna ikki mamlakat prezidentlari o‘rtasidagi kelishuvga ko‘ra, Qozog‘istondan Rossiyaga jo‘nab ketgani aytiladi.

Qozog‘iston Mudofaa vazirligi bu ma’lumotni rad etdi.

“Xabar haqiqatga to‘g‘ri kelmaydi. Bu Qozog‘iston texnikasining RFga yuborilishi emas”, — deya izoh berdi idora matbuot xizmati.

Vazirlik ma’lum qilishicha, ayni paytda Qozog‘istonda Kollektiv xavfsizlik shartnomasi tashkiloti (KXSHT) qo‘shma harbiy mashg‘ulotlari uchun texnika ko‘chirib o‘tkazilmoqda. O‘quv mashqlari haqidagi axborot muassasaning rasmiy saytiga joylangan bo‘lib, unda aytilishicha, tadbirlar 26-sentabrdan 8-oktabrga qadar Jambil va Almati viloyatlarida bo‘lib o‘tadi.

“Ushbu harbiy mashg‘ulotlarda qatnashish uchun 22—30-sentabr kunlari mamlakatimizga KXSHTga a’zo davlatlar harbiy kontingentlari kirib keladi. Ular turli usullarda — temir yo‘l, havo transporti va g‘ildirakli harbiy texnika yordamida harakatlanadi. Shu munosabat bilan fuqarolardan ijtimoiy tarmoqlarda tarqalayotgan mishmishlarga ishonmaslikni va faqat rasmiy axborot manbalariga tayanishni so‘raymiz”, — deyilgan xabarda.

Avvalroq Qozog‘iston Tashqi ishlar vazirligi respublika, go‘yoki, Kollektiv xavfsizlik shartnomasi tashkiloti (KXSHT) a’zoligidan chiqishi haqidagi axborotni rad etgan edi.

KXSHT nima?

Kollektiv xavfsizlik shartnomasi tashkiloti — ayni paytda Armaniston, Belarus, Qozog‘iston, Qirg‘iziston, Rossiya va Tojikistonni o‘z ichiga olgan Yevrosiyo hukumatlararo harbiy ittifoqi. Tashkilotni tuzish haqidagi shartnoma 1992-yil 15-mayda imzolangan.

KXSHT maqsadlari tinchlikni, xalqaro va mintaqaviy xavfsizlik va barqarorlikni mustahkamlash, a’zo davlatlar mustaqilligi, hududiy yaxlitligi va suverenitetini kollektiv asosda himoyalashdan iborat.

Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatildi. Qozog‘istondagi tartibsizliklar fonida mamlakat bo‘ylab favqulodda holat e’lon qilindi. Mamlakat prezidenti Qosim-Jo‘mart To‘qayev KXShTdan tinchlikparvar kuchlarini yuborishni so‘radi. 6-yanvardan Qozog‘istonga KXSHT harbiylarini jo‘natish boshlandi.

11-yanvar kuni To‘qayev mamlakatdagi vaziyat barqarorlashgani, ikki kundan keyin tinchlikparvar kuchlarni olib chiqish boshlanishi mumkinligini ma’lum qildi. 19-may kuni Rossiya Qozog‘istondan tinchlikparvar kuchlarini olib chiqishni yakunladi.

To‘qayevning so‘zlariga ko‘ra, KXSHT Qozog‘iston uchun og‘ir vaziyatda ko‘mak ko‘rsatgan, ularning kelishi Olmaotani hujumchilardan ozod etish imkonini bergan. Olmaota va to‘qqizta viloyat markazlari ularning qo‘liga o‘tib ketgan payt bo‘ldi, biroq KXSHT kontingenti kelib, Qozog‘istonning eng yirik shahrini hujumchilar qo‘lidan olib qo‘yishga yordam berdi, degandi mamlakat prezidenti.