Jo‘rabek Mirzamahmudov 2022-yil 29-sentabr kuni energetika vaziri lavozimiga tasdiqlandi. Bu haqda prezident matbuot kotibi xabar berdi.
Qayd etilishicha, prezident farmoni bilan Jo‘rabek Tursunpo‘latovich Mirzamahmudov bosh vazirning yoqilg‘i-energetika va kimyo sohalarini rivojlantirish bo‘yicha o‘rinbosari — energetika vaziri lavozimiga tasdiqlandi.
Jo‘rabek Mirzamahmudov “boshqa ishga o‘tgani sabab” energetika vazirining birinchi o‘rinbosari lavozimidan 2020-yil 3-noyabrda ozod etilgandi.
Prezidentning 3-noyabrdagi boshqa qarori bilan energetika vazirining birinchi o‘rinbosari va “O‘zatom” agentligi direktori lavozimlari ajratilgan. Jo‘rabek Mirzamahmudov 2018-yil iyunidan “O‘zatom” agentligini boshqarib kelayotgan edi. 2019-yilning fevral oyida “O‘zatom” rahbari sifatida energetika vazirining birinchi o‘rinbosari lavozimiga tayinlangandi. “Gazeta.uz”ning yozishicha, u “O‘zatom” agentligi rahbari lavozimini saqlab qolgan.
2020-yilning yanvar oyidan Mirzamahmudov “O‘zkimyosanoat” kompaniyasining boshqaruvi raisi vazifasini bajaruvchi bo‘lib faoliyat olib borayotgan edi. Endi u ushbu lavozimga “vazifasini bajaruvchi” qo‘shimchasisiz tasdiqlangan.
Ma’lumot uchun, Jo‘rabek Mirzamahmudov (1979-yilda tug‘ilgan) 2001-yilda “Umid” jamg‘armasi granti asosida AQSHdagi Alabama universitetini, 2005-yilda esa Toshkent kimyo texnologiyalari institutini tamomlagan. Bunga qadar Vazirlar Mahkamasi Yoqilg‘i-energetika kompleksini rivojlantirish axborot-tahlil departamenti mudiri bo‘lib ishlagan. “O‘zkimyosanoat” boshqaruvi raisining o‘rinbosari va iqtisodiyot vaziri o‘rinbosari lavozimlarida faoliyat ko‘rsatgan. 2018-yil iyunidan “O‘zatom” agentligini boshqarib kelgan.
Rahbarlik lavozimi bo‘sh turgan vazirlik
Prezident farmoniga asosan 2022-yilning aprel oyida Alisher Sultonov salomatligi tufayli boshqa ishga o‘tishi munosabati bilan energetika vaziri lavozimidan ozod etilgan edi. O‘shanda energetika vaziri lavozimini kim egallashi haqida ma’lumot berilmagandi.
O‘zbekistonda energetika sohasidagi yagona davlat siyosatini o‘rnatuvchi yangi vakolatli organ — Energetika vazirligi 2019-yil fevralida tashkil etilgan. Vazirlikka O‘zbekiston bosh vaziri o‘rinbosari Alisher Sultonov rahbar bo‘lgan.
Izoh (0)