Qo‘qon shahrida Janubiy Koreya kompaniyasi tomonidan Hanshin Park City shaharchasi bunyod etiladi. Shaharchadan 127 ta ko‘p qavatli uy, taunxauslar, park, maktab, bolalar bog‘chasi va boshqa zarur ijtimoiy obyektlar o‘rin oladi, deb xabar bermoqda “Daryo” muxbiri Azizjon Ermatov.
Qayd etilishicha, Farg‘ona viloyati hokimi Xayrullo Bozorov Janubiy Koreyaning Hanshin Engineering & Construction kompaniyasi boshqaruvi raisi Chxve Yon Son boshchiligidagi delegatsiya vakillari bilan uchrashgan. Uchrashuvda Koreya kompaniyasi tomonidan Qo‘qon shahrida Hanshin Park City shaharchasini barpo etish loyihasi muhokama qilingan.
Farg‘ona viloyati delegatsiyasining joriy yil mart oyida Janubiy Koreyaga amaliy tashrifi doirasida Qo‘qon shahrida Hanshin Park City shaharchasini barpo etish bo‘yicha qiymati 250 million dollarlik investitsion kelishuv imzolangan edi.
Kelishuvga ko‘ra, Janubiy Koreya kompaniyasi Qo‘qon shahrida 9, 12 va 16 qavatli 5 ming 122 xonadondan iborat Hanshin Park City shaharchasini barpo etadi.
Ko‘p qavatli uylarning yerto‘la qismida besh mingdan ziyod avtomobil uchun yerosti avtoturargohi o‘rin oladi. Uch yillik reja asosida amalga oshiriladigan loyihaning ilk bosqichida 206 ta xonadondan iborat oltita to‘qqiz qavatli turar joy binosi qad rostlaydi.
Izoh (0)