O‘zbekiston musulmonlari idorasi Fatvo markazi direktori o‘rinbosari G‘ulomiddin Xolboyev va mamlakat elchixonasi xodimlari 24—25-sentabr kunlari Misr Vaqf vazirligining Islom oliy kengashi tomonidan tashkil etilgan “Ijtihod – zamon talabi. Uning ko‘rinishlari, shartlari va ulamolari” mavzusidagi 33-xalqaro konferensiyada ishtirok etdi. Bu haqda “Dunyo” axborot agentligi xabar qildi.
Qayd etilishicha, ikki kun davom etgan ushbu anjumanda dunyoning 55 davlatidan 200 nafardan ortiq vazir, muftiy, olim va mutafakkirlar hamda ommaviy axborot vositalarining vakillari qatnashgan.
Konferensiyada islom olamidagi ilmiy-tadqiqot markazlari, diniy idoralar vakillari va taniqli ulamolarning mavzu bo‘yicha ma’ruzalari tinglangan. Mavjud muammolarni hamkorlikda yechish yo‘llari ham muhokama qilingan.
Anjuman yakunida butun dunyo ulamolari ijtihod va boshqa muhim masalalarda o‘zaro hamkorlikni chuqurlashtirishga kelishib olingan. Shuningdek, muhokama qilingan masalalar bo‘yicha tegishli qarorlar qabul qilingan.
Izoh (0)