“Dinni xunuk ko‘rsatib qo‘ymang, azizim!” Muftiy O‘zbekistondagi ahli ilmlarga murojaat yo‘lladi

Muftiy Nuriddin Xoliqnazarov O‘zbekistondagi ahli ilmlarga murojaat qildi. Murojaatda bugungi kunda o‘zlarining xatti-harakatlari bilan dinni xunuk ko‘rsatib qo‘yayotgan ba’zi ahli ilmlar haqida gapirilib, ularga dinni yetkazishda chiroyli yo‘ldan borish zarurligi aytib o‘tilgan.

“Yurtimizda barcha sohalarda bo‘lgani kabi diniy sohada ham ko‘plab islohotlar amalga oshirildi. Dinimizga, e’tiqodimizga berilayotgan imkoniyatlar Allohning katta ne’matlaridan biri. Shu bilan birga oxirgi paytda diniy tortishuvlar ham ko‘payib ketdi. Ayniqsa ijtimoiy tarmoqlarda. Bu esa tafriqaga sabab bo‘lmoqda.

Ba’zi ahli ilmlarimiz voqelikka qaramay, turli gaplarni aytishlari ham tortishuvlarga sabab bo‘lmoqda. Yana ba’zi insonlar ustoz ko‘rmay, yetarli bilim olmay diniy mavzuda turli fatvolarni berishi juda katta fitnalarni keltirib chiqaryapti.

Bu gaplardan keyin ahli ilmlarga nisbatan salbiy qarashlar yuzaga kelmoqda. Go‘yoki mana shunday gaplarni gapirib xato qilgan domlalarga qarab din faqat mana shular deb tushunilmoqda. Barcha ahli ilmlar mana shunday deb o‘ylanmoqda.

Natijada Allohning dini yo‘lida xolis xizmat qilayotgan olim, parhezkor domlalarni ham ular qatorida ko‘rilmoqda. Bu katta musiybat.

Din bu tortishuv, haqorat, bir-birini kamsitish uchun kelgan emas. Din bu nasihat. Ana shu qoidaga muvofiq juda ham ehtiyot bo‘lishimiz kerak.

Qur’oni Karimdagi “Nahl” surasining 125-oyatida Alloh shunday marhamat qiladi: “Robbingning yo‘liga hikmat va yaxshi mav’iza ili da’vat qil. Va ular ila go‘zal uslubda mujodala et. Albatta Robbing O‘z yo‘lidan adashganlarni o‘ta bilguvchi va hidoyat topguvchilarni ham o‘ta bilguvchidir”. Ushbu oyat insonlarni da’vat qilishda uchta sifatga ega bo‘lishga chaqirmoqda. Allohni yo‘liga chaqirishda hikmat, mav’izai hasana bo‘lishlik va ular bilan chiroyli muomala qilishlikka chaqirilyapti.

Va’z-nasihat qilayotgan kishi avvalo vaziyatni to‘g‘ri baholashi va unga muloyimlik va hikmat bilan yondoshishi kerak. Bu oyati karima Makka mushriklari musulmonlarga qattiq ozor berayotgan paytda nozil bo‘lgan. Alloh aytmadiki, Sizlarga ozor berayotganlarni borib jazosini beringlar, Allohni tanitishlikda ularni o‘ldiringlar, ularga azob beringlar, demadi. Alloh aytyapti, hikmat bilan, ma’izai hasana bilan ularga munosabat bildirish buyurilyapti. Agar musulmonlarga ozor berayotgan kofir kimsalargaki chiroyli nasihat qilishga buyurilayotgan bo‘lsa, unda musulmonlarga nisbatan nasihat qilishlik qanday bo‘ladi?

Bundan o‘zimizga yarasha xulosa olishimiz kerak. Nasihat yumshoqlik va muloyimlik bilan olib boriladi. Payg‘ambarimiz sollallohu alayhi vasallam qo‘pol, dag‘al gapiruvchi, haqorat qiluvchi Zot bo‘lmaganlar. Ming afsuski, Alloh nomidan gapirib, haqorat qilib yuborishlik, Payg‘ambarimiz sollallohu alayhi vasallam nomidan gapirib, fahsh so‘zlarni ishlatib da’vat qilishliklarni ham eshitib qolyapmiz. Alloh O‘zi kechirsin!”