Checheniston rahbari Ramzan Qodirov Rossiyada e’lon qilingan qisman safarbarlik doirasida respublika aholisini harbiy xizmatga chaqirishga bag‘ishlangan yig‘ilish o‘tkazdi. Qodirovning so‘zlariga ko‘ra, Chechenistonda harbiy xizmatga chaqirish rejasi “254 foizga ortig‘i bilan bajarilgan” va shu vaqtga qadar respublikaning 20 ming aholisi Ukrainadagi harbiy amaliyotda qatnashgan.
Uning ta’kidlashicha, bu ko‘rsatkichga hali safarbarlik e’lon qilinmasidan avval Mudofaa vazirligining yangi bo‘linmalari tashkil etilgani tufayli erishilgan.
Respublikada zarurat tug‘ilganda Vatan himoyachilari safiga qo‘shila oladigan minglab ko‘ngillilar zaxirasi mavjud. Shuning uchun men Checheniston respublikasi aholisini, xususan, sevimli va hurmatli onalarimizni xotirjam bo‘lishga chaqiraman, — deb yozdi u Telegram’da.Ramzan Qodirovning fikricha, “har bir inson aniq fuqarolik pozitsiyasiga ega bo‘lishi va go‘l bo‘lmasligi kerak”.
“Vatanparvarman deb qichqirib, ko‘ksini urib, Rossiyani safarbarlik davriga tashlab ketganlarga kelsak, bunday qo‘rqoqlar uchun qaytish yo‘li abadiy berkilishi zarur”, — dedi u.
Vladimir Putin 21-sentabrdan boshlab Rossiyada qisman safarbarlik e’lon qildi. Rossiya Mudofaa vazirligi 300 ming zaxiradagi askar chaqirilishini aytdi. “Novaya Gazeta. Yevropa” nashri 1 million kishi harbiy xizmatga chaqirilishi haqida xabar berdi, biroq Kreml bu ma’lumotni “yolg‘on” deb atadi.
Izoh (0)