“O‘zgidromet” yomg‘ir yog‘ib, kuchli shamol bo‘lishidan ogohlantirdi

“O‘zgidromet” rahbari tezkor gidrometeorologik axborot e’lon qildi. Unga ko‘ra, 25—27-sentabr kunlari O‘zbekiston hududiga salqin va biroz nam havo kirib keladi.

25-sentabrda Qoraqalpog‘iston Respublikasi va Xorazm viloyatida, 26—27-sentabr kunlari respublika bo‘yicha ba’zi joylarda shamol 15-20 metr/sekundgacha kuchayishi, ayrim joylarda chang-to‘zonlar kuzatilishi kutilmoqda.

25—26-sentabrda Qoraqalpog‘iston Respublikasida, 27-sentabrda Surxondaryo viloyatida va Farg‘ona vodiysi viloyatlarida ba’zi joylarda shamolning kuchayishi 21-23 metr/sekundga yetishi mumkin.

25-sentabrda Qoraqalpog‘iston Respublikasida, Xorazm viloyatida, 26-sentabrda Qoraqalpog‘iston Respublikasida, Xorazm, Buxoro, Navoiy viloyatlarida, 27-sentabrda respublikaning tog‘ oldi va tog‘li hududlarida ba’zi joylarda yomg‘ir yog‘adi, momaqaldiroq bo‘lishi mumkin.

Baland tog‘larda (2500 metrdan yuqorida) yomg‘ir qorga aylanishi mumkin. 26-sentyabrda shimolda, 27-sentabrda respublikaning barcha hududlarida havo harorati kechalari 10-13 darajagacha, kunduz kunlari 22-25 darajagacha pasayadi.

Avvalroq “O‘zgidromet” mutaxassisi Erkin Abdulahatov O‘zbekistonda kelayotgan hafta boshidan kunlar asta-sekin soviy boshlashini ma’lum qilgandi.