“Daryo” kundaligida 23-sentabrda sodir bo‘lgan eng muhim voqealar

“Daryo” nashri 23-sentabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.

“Men nima bo‘layotganini ruslarga rus tilida tushuntiraman” — Zelenskiy rossiyaliklarga rus tilida murojaat qildi

Ukraina prezidenti Vladimir Zelenskiy urushning 211-kun yakunlari bo‘yicha murojaatini e’lon qildi, deya xabar qiladi Meduza.

Zelenskiy o‘z nutqining bir qismini Rossiyada e’lon qilingan safarbarlikka bag‘ishladi. E’tiborli jihati, Ukraina rahbari o‘z murojaatini aynan rus tilida bildirdi.

Men ruslarga nima bo‘layotganini rus tilida tushuntiraman.Ushbu urushda olti oy ichida 55 ming rus askari halok bo‘ldi. O‘n minglab odamlar yarador va mayib bo‘ldi. Ko‘prog‘ini istaysizmi? Yo‘qmi? Unda norozilik bildiring. Kurashing. Qochib keting. Yoki Ukraina asirligiga taslim bo‘ling. Bular omon qolish uchun variantlardir.

Checheniston rahbari Ramzan Qodirov esa Rossiyada e’lon qilingan qisman safarbarlik doirasida respublika aholisini harbiy xizmatga chaqirishga bag‘ishlangan yig‘ilish o‘tkazib, Chechenistonda harbiy xizmatga chaqirish rejasi “254 foizga ortig‘i bilan bajarilgan”i va shu vaqtga qadar respublikaning 20 ming aholisi Ukrainadagi harbiy amaliyotda qatnashganini ma’lum qilgan.

So‘nggi 10 yil ichida Rossiya fuqaroligini olgan markaziy osiyoliklarga RFda harbiy xizmat o‘tash majburiyati yuklanishi mumkin

So‘nggi o‘n yil ichida Rossiyada fuqarolik olgan markaziy osiyoliklarga harbiy xizmat o‘tash majburiyati yuklanishi mumkin. Bu haqda Rossiya prezidenti huzuridagi Inson huquqlari bo‘yicha kengash a’zosi Kirill Kabanov ma’lum qildi.

“Rossiya prezidenti tomonidan e’lon qilingan qisman safarbarlik doirasida Rossiya fuqaroligini olganiga o‘n yildan oshmagan yangi fuqarolar uchun bir yil ichida majburiy harbiy xizmat o‘tash bo‘yicha takliflar tayyorlayapmiz. Bu Markaziy Osiyo: Qozog‘iston, Qirg‘iziston, Tojikiston va O‘zbekistondan kelganlarga tegishli bo‘ladi”, — deb yozdi u o‘z Telegram-kanalida.

DXR, LXR, Xerson va Zaporojye viloyatlarida Rossiya tarkibiga kirish bo‘yicha referendumlar boshlandi

Ayni vaqtda o‘zini o‘zi respublika deb e’lon qilgan Lugansk va Donetsk xalq respublikalarida, shuningdek, Ukrainaning Rossiya qo‘shinlari nazoratidagi Zaporojye va Xerson viloyatlarida “Rossiya tarkibiga qo‘shilish bo‘yicha referendumlar” boshlangan.

Saylov komissiyalari Toshkent vaqti bilan soat 10:00 da ish boshladi. Rossiyada ham “ovoz berish” uchun saylov uchastkalari ochildi. Barcha hududlarda “ovoz berish” besh kun, ya’ni 27-sentabrgacha davom etadi. Shundan so‘ng ovozlarni sanash boshlanadi.

Jahonda ro‘y berayotgan voqealar yuzasidan “Daryo” jamoasi aholi orasida so‘rovnoma o‘tkazdi. Umuman olganda, ushbu jarayonlarga nisbatan yurtdoshlarimizning ko‘pchiligi adekvat fikrlashi namoyon bo‘ldi.

“Men avvalgilar kabi xiyonatkor emasman” — Sadir Japarov chegara masalasini hal qilish uchun yerdan voz kechmasligini aytdi

Qirg‘iziston prezidenti Sadir Japarov qo‘shni davlatlar bilan chegara masalasini hal qilish uchun yerdan voz kechmasligini aytdi. U respublika armiyasining hozirgi holati haqida ham gapirdi.

Japarovning qayd etishicha, Qirg‘izistonning amaldagi hukumati avvalgi prezidentlar berib yuborgan yerlarni qaytarib olmoqda.

“Bu yer meniki yo sizniki emas. Bu minglab yillar davomida yashaydigan qirg‘iz xalqining kelajak avlodlari zamini”, — dedi Japarov “Kabar” davlat agentligiga bergan intervyusida.