Qashqadaryo viloyatining Yakkabog‘ tumanidagi 75-umumta’lim maktabi balansidagi yer uchastkalari ko‘p qavatli turar joy binosi qurish uchun ajratilib, asossiz ravishda begonalashtirilib, talon-toroj qilingani aniqlangandi. Holatga Qashqadaryo viloyati xalq ta’limi boshqarmasi munosabat bildirdi.
Qayd etilishicha, holat vazirning Nazorat-huquqiy xizmati va Qashqadaryo viloyati xalq ta’limi boshqarmasi mas’ullari ishtirokida atroflicha o‘rganildi.
O‘rganish jarayonida Yakkabog‘ tumanidagi 75-sonli umumta’lim maktabi hududidagi 89 sotix yer maydoni tuman hokimining tegishli qarorlari bilan “Buyuk Turon Chinor” va “Yuqori sifat innovatsion” qurilish MCHJlarga prezidentning 2018-yil 5-sentabrdagi “Xalq ta’limi tizimiga boshqaruvning yangi tamoyillarini joriy etish chora-tadbirlari to‘g‘risida” gi qarori talablariga zid ravishda ko‘p qavatli bino qurish uchun ajratib berilgani aniqlangan.
Mazkur holat yuzasidan maktab direktori F.S. tomonidan Yakkabog‘ tumani xalq deputatlari kengashi va tuman xalq ta’limi bo‘limi mudiri Uzoq Nurmatov nomiga ariza yo‘llab murojaat qilgan. Xalq ta’limi bo‘limida ijro qilish qurilish ekspluatatsiya xizmati boshlig‘i M.S.ga yuklatilgan.
Biroq M.S. mas’uliyatsizlikka yo‘l qo‘yib, murojaat ijrosini ta’minlamay, ta’lim muassasasining 89 sotix yer maydoni noqonuniy ravishda o‘zlashtirilgani yuzasidan kelgan murojaatni Qashqadaryo viloyati xalq ta’limi boshqarmasi qurilish bo‘limiga taqdim etmasdan, holatni yashirgan.
Shuningdek, mazkur murojaat xalq ta’limi bo‘limi Jismoniy va yuridik shaxslarning murojaatlari bilan ishlash bo‘yicha mutaxassis J.I. (hozirda boshqa bo‘limning boshqa tarmog‘ida faoliyat yuritadi) nazoratidan chetda qolgan.
O‘rganish natijalari yuzasidan xalq ta’limi bo‘limi mudiri Uzoq Nurmatovning 15-sentabrdagi buyrug‘i bilan J.I. va M.S.ga Mehnat kodeksining 181-moddasi birinchi qism 1-bandiga muvofiq hayfsan intizomiy chorasi qo‘llangan.
Ayni paytda holat yuzasidan Jinoyat kodeksining 205-moddasi bilan jinoyat ishi qo‘zg‘atilib, dastlabki tergov harakatlari olib borilmoqda.
Ma’lumot uchun, prezidentning “Xalq ta’limi tizimiga boshqaruvning yangi tamoyillarini joriy yetish chora-tadbirlari to‘g‘risida” 2018-yil 5-sentabrdagi qarorining 10-bandi bilan umumta’lim va maktabdan tashqari muassasalarning yer uchastkalari va ko‘chmas mulkini Xalq ta’limi vazirligi bilan kelishmasdan begonalashtirish taqiqlangan.
Shuningdek, prezidentning 2021-yil 17—18-iyun kunlari Andijon viloyatiga tashrifi davomida berilgan topshiriqlar hamda o‘tkazilgan yig‘ilish bayonining 91-bandida ijtimoiy soha (ta’lim, sog‘likni saqlash, sport, madaniyat muassasalari) obyektlari va yer uchastkalari ushbu sohalardan tashqari boshqa maqsadlar uchun yuridik va jismoniy shaxslarga berilishi taqiqlangan.
Izoh (0)