21-sentabrda AQSH Federal zaxira tizimi (Fed)ning keyingi yil uchun asosiy stavkani 0,75 foiz darajaga oshirish haqidagi qarori dollar kursining sezilarli darajada mustahkamlanishiga olib keldi. Bu haqda “Kommersant” xabar bermoqda.
Bir nechta valyutalar darhol dollarga nisbatan rekord darajada pastga tushib ketdi. Bunga Fed stavkaning o‘sishda davom etishini va 2024-yilgacha qisqartirilishi dargumon ekanligini aniq ko‘rsatgani sabab bo‘ldi.
Oqibatda bugun, 22-sentabrda Hindiston rupiysining dollarga nisbatan kursi yangi rekord darajaga tushdi — bir dollar uchun 80,5 rupiy. Bir kun avval bir dollar 79,98 rupiyga teng edi.
Turk lirasi ham eng past kursni yangiladi — bir dollar 18,37 liraga teng. Yevroning dollarga nisbatan kursi so‘nggi 20 yildagi eng past ko‘rsatkichga yetdi — bir yevro uchun 0,98 dollar.
Bunday sharoitda ko‘plab Markaziy banklar milliy valyutalarni qo‘llab-quvvatlash choralarini ko‘rdi. Hindiston zaxira banki bu uchun bir necha oy davomida faol ravishda valyutaga intervensiya qilmoqda.
Birgina iyul oyida u valyuta kursini bir dollarga nisbatan 80 rupiy atrofida ushlab turish uchun 19 milliard dollar zaxirasini bozorga chiqardi.
Garchi Fed qarori iyenaga hech qanday ta’sir ko‘rsatmasa ham, 22-sentabrda 1998-yildan beri birinchi valyuta intervensiyasi Yaponiya banki tomonidan amalga oshirildi.
Ushbu valyuta intervensiyasidan so‘ng, iyena dollarga nisbatan 2 foizga oshib, bir dollar uchun 141,1 iyenani tashkil qildi.
Izoh (0)