O‘zbekistondagi mingdan ortiq bog‘chada idish-tovoqlarni yuvish uchun sharoit yetarli emas. Bu haqda Sanitariya-epidemiologik osoyishtalik va jamoat salomatligi xizmati boshlig‘i o‘rinbosari Nurmat Otabekov Senat kengashining majlisida ma’lum qildi, deya xabar bermoqda “Daryo” muxbiri.
Nurmat Otabekovning ta’kidlashicha, bog‘chalarda kasallanishlarga 4 asosiy omil sabab bo‘lmoqda.
“Maktabgacha ta’lim tashkilotlarida sifatsiz oziq-ovqat mahsulotlarining ishlatilishi, ovqat tayyorlash texnologik jarayoniga rioya etmaslik, muassasada nomutaxassislarning faoliyat yuritayotgani va ular oddiy sanitariya minimumini o‘qimaganliklari guruhli kasallanishlarga sabab bo‘lmoqda. Autsorsinglar bizning faoliyatimizga, ayniqsa, MTTlarining oziq-ovqat mahsulotlarini yetishtirish, mahsulotlarni pishirib, tayyorlab berish jarayoniga aralashuvi boshlangandan keyin tartibsizlik avjiga chiqib ketdi. MTTning oshxonasida, aytaylik, tadbirkorlik subyekti faoliyat olib borgandan keyin, unga prezidentimizning 6221-sonli qarorga muvofiq, uch oyda bir marotaba kira olamiz. U o‘n kun oldin biz kelishimizdan xabardor bo‘ladi. Hamma joyni supirib, toza qilib, biz kelishimizga hech qanaqa kamchiliklarni ko‘rsatmaydigan qilib qo‘yishi mumkin”, — dedi mutaxassis.
Nurmat Otabekovning qo‘shimcha qilishicha, ko‘plab bog‘chalarda idishlarni yuvish uchun sharoit yetarli emas va bu holat ham kasallanishlarni keltirib chiqarishi mumkin.
“Hozir O‘zbekistonda mavjud bo‘lgan maktabgacha ta’lim tashkilotlarining qariyb 30 foizi (1 200 ga yaqini) moslashtirilgan binoda. Ularning suv ta’minotiga e’tibor beradigan bo‘lsak, aksariyat qismida 3 ming 48 ta holatda idish-tovoqlarni yuvish uchun sharoit yo‘q — tog‘oralardan foydalaniladi. Shunga o‘xshash holatlarning hammasi keyinchalik guruhli kasallanishga sabab bo‘lishi mumkin.
Biz mahsulotlarni xavfsizlik nuqtayi nazardan laboratoriyalarda tekshirgan vaqtimizda bir jihatga e’tibor berdik. Ularning salkam 10 foizi bakteriologik nuqtayi nazardan, 5 foizi parazetologik nuqtayi nazardan, salkam 5 foizi kimyoviy nuqtayi nazardan talabga javob bermaydi. Bundan ko‘rinib turibdiki, men 100 foiz maktabgacha ta’lim muassasasida shunaqa degan fikrdan uzoqdaman”, — dedi u.
Avvalroq Senat raisi Tanzila Norboyeva hokimliklar tomonidan oziq-ovqat mahsulotlari narxlari pasaytirib ko‘rsatilayotgani sababli yetkazib beriladigan mahsulot sifatining pasayishi yoki hajmining kamayishi kuzatilayotganini aytgandi.
Izoh (0)