O‘zbekistondagi bog‘chalar soni besh yilda salkam 23 mingtaga ko‘paygani ma’lum qilindi

Bugungi kunda respublikadagi bog‘chalar soni 28 ming 12 tani tashkil etmoqda. Bu haqda Senat kengashining navbatdagi majlisida ma’lum qilindi, deya xabar bermoqda “Daryo” muxbiri.

Yig‘ilishda Senat raisi Tanzila Norboyeva respublikada maktabgacha ta’lim tashkilotlari soni yildan yilga ortib borayotganini aytdi.

“2017-yilda respublika bo‘yicha jami 5 ming 211 ta maktabgacha ta’lim tashkilotiga 708 ming 247 nafar bola (3-7 yoshdagi bolalarning 27,7 foizi) qamrab olingan bo‘lsa, bugungi kunga kelib, 28 ming 12 ta maktabgacha ta’lim tashkilotiga 1 million 957 ming 358 nafar bola (69,4 foiz) qamrab olingan”, — dedi Senat raisi.

Ma’lum qilinishicha, 2022-yil 1-yanvar holatiga mamlakatda 6 ming 300 ta davlat maktabgacha ta’lim tashkiloti faoliyat ko‘rsatib, ularda 1 million 276 ming nafar bola qamrab olingan. Shundan 1 ming 185 ta davlat bog‘chalarida ovqatlanish autsorsing usulida tashkil etilgan bo‘lsa, 5 ming 145 tasi o‘z oshxonasiga ega.

Avvalroq Tanzila Norboyeva davlat bog‘chalarida ovqatlanishni tashkil etish tizimidagi kamchiliklarni tanqid qilgandi.