“Daryo” nashrining YouTube’dagi kanalida taniqli xonanda Janob Rasul bilan suhbat tashkil qilindi. Xonanda Dubayda olingan klipi unga qimmatga tushishi va YouTube’dan yiliga 100 ming AQSH dollari miqdorida daromad olishi haqida gapirib berdi.
— Men o‘zimni qimmat pulga klip oldiradigan xonanda deb bilmayman. Chunki Yevropada suratga olinayotgan kliplarni ham kuzatib boraman. Bizda ulardek 300-400 ming AQSH dollari sarflanadigan kliplar olinmaydi. Mening eng qimmat klipim “90-60” qo‘shig‘iga olingan. Unga umumiy hisobda 30 ming AQSH dollari sarflaganman. Chunki O‘zbekistondan Dubayga 11 kishi borganmiz, mehmonxona xarajatlaridan tashqari, u yerdan ikkita operator yollaganmiz. Bundan tashqari, Dubay shahrida klip suratga olish uchun ham alohida pul to‘lanishi kerak ekan. Shuning uchun ham bu qo‘shiqning klipi menga ancha qimmatga tushgan, — deydi xonanda Janob Rasul.
Xonanda ko‘p mablag‘ sarflangan klipi sabab ko‘plab tanqidlarga uchragani va nima uchun unda ochiq sahnalardan foydalangani haqida ham gapirdi.
— Birinchi maqsadim shu klip orqali o‘zbek qo‘shiqlarini xorijliklarga ko‘rsatish bo‘lgan. Men “90-60” klipi orqali maqsadimga yetdim. Chunki qo‘shiqni qozoq, qirg‘iz, arab va kavkazlik xonandalar o‘z tiliga o‘girib ijro etishdi. Shu bois klipda shunday kichik sahnadan foydalanganmiz. Menimcha, qizning usti u qadar ochiq emas. Chunki kliplarimni nafaqat kattalar, balki yosh bolalar ham tomosha qilishadi.Aslida bu sahna suratga olinayotganidan xabarim bo‘lmagan. Klipni rus operatorlari suratga olgani uchun qizning usti bundan ham kattaroq ochiq bo‘lgandi. “Bizda mumkin emas, litsenziyamdan ayrilib qolishni istamayman”, deb grafika yordamida ochiq sahnalarni yoptirganman, — deydi xonanda Janob Rasul.
Xonanda milliy qo‘shiqlar ham yaratgani, ammo hech qanday natijaga erishmaganini quyidagicha izohladi.
— Zamonaviy qo‘shiqlardan avval maqom, turk va hind ohangidagi qo‘shiqlarni ijro etdim. Hatto sof o‘zbekona klip ham suratga oldirganman. Ammo hech qanday natijaga erishmaganman.“90-60” klipi qancha tanqidlarga uchragan bo‘lsa ham YouTube’da eng ko‘p ko‘rilgan kliplardan biri hisoblanadi. Uni nafaqat O‘zbekistonda, O‘rta Osiyo, Janubiy Koreya, Moskva va AQSHda ham tomosha qilishadi. Nazarimda, dunyoga chiqib olmagunga qadar milliy qo‘shiqlar bilan ularning e’tiborini tortib bo‘lmaydi. Shu bois o‘zbek san’atini xorijda targ‘ib qilishdan avval ularning nazariga tushish kerak, — deydi xonanda Janob Rasul.
Xonanda YouTube’dan oyiga qancha daromad topishi va kliplarining ko‘p ko‘rilish sababini ham ochiqladi.
— Qo‘shiqlarim oddiy so‘zlardan iborat. U qandaydir ma’noni bildirmaydi, faqatgina so‘zlar ketma-ketligi bir-biriga mos tushadi. YouTube’dan yiliga 100 ming dollar daromad olaman. Bu oyiga 8 ming dollar degani. Ba’zan bu ko‘rsatkichlar ortib ketadi yoki biroz pasayishi ham mumkin. Hozirda YouTube’da eng ko‘p ko‘rilgan klipim “90-60” hisoblanadi. U ikki yilda 68 million marta ko‘rilgan, — deydi xonanda Janob Rasul.
Mavzuga doir:
Izoh (0)