O‘zbekistonning Vengriyadagi elchisi (qarorgohi Vena shahrida joylashgan) Abat Fayzullayev Budapesht shahrida “Meditop” kompaniyasining boshqaruvchi direktorlari Zoltan Ach va David Greshkovits bilan muzokaralar o‘tkazdi, deb xabar bermoqda “Dunyo” axborot agentligi.
Qayd etilishicha, muzokaralar davomida Vengriya kompaniyasi bilan O‘zbekistonda farmatsevtika mahsulotlarini mahalliylashtirish loyihasini amalga oshirish masalasi muhokama qilingan.
Zoltan Ach mamlakatga safarlari chog‘ida O‘zbekiston rahbariyati tomonidan iqtisodiyotning barcha jabhalarida amalga oshirilayotgan islohotlar o‘zining ijobiy natijasini berayotgani va O‘zbekiston mintaqada izchil rivojlanib borayotganiga shaxsan guvoh bo‘lganini ma’lum qilgan.
“O‘zbekiston hukumatining xorijiy investorlarni qo‘llab-quvvatlayotgani, investorlar uchun yaratilgan qulay investitsiya muhiti va sharoitlar, shuningdek, yuqori bilim va ko‘nikmaga ega bo‘lgan yoshlar ‘Meditop’ kompaniyasini O‘zbekiston bozoriga kirishi uchun turtki bo‘ldi”, — deydi u.
Kompaniya boshqaruvchi direktori David Greshkovis O‘zbekistonda amalga oshirilishi ko‘zda tutilgan investitsiya loyihasini, xususan, ro‘yxatga olingan dori vositalarini mahalliylashtirish loyihasi bo‘yicha hamkorlik qilishga tayyor ekanini bildirgan. Bu sohada muayyan tajribaga ega bo‘lgan mahalliy hamkor topish yuzasidan amaliy ko‘mak so‘ragan.
Bundan tashqari, muzokaralar davomida “Meditop” kompaniyasi bilan hamkorlikda farmatsevtika yo‘nalishida kadrlar tayyorlash va mahalliy ishlab chiqaruvchi kompaniyalar xodimlari uchun Vengriyada malaka oshirish kurslarini tashkil etish bo‘yicha dastlabki kelishuvlarga erishilgan.
Izoh (0)