19-sentabr kuni Nyu-York shahrida Birlashgan Millatlar Tashkiloti Bosh Assambleyasining 77-sessiyasi doirasida O‘zbekiston tashqi ishlar vaziri Vladimir Norovning BMT Oziq-ovqat va qishloq xo‘jaligi tashkiloti (FAO) bosh direktori Tsuy Dunyu bilan uchrashuvi bo‘lib o‘tdi. Bu haqda TIV axborot xizmati xabar berdi.
Norovning qayd etishicha, O‘zbekiston FAOni barqaror rivojlanish maqsadlariga erishish uchun muhim global ko‘p tomonlama platforma deb biladi.
So‘nggi yillarda O‘zbekiston va FAO o‘rtasidagi hamkorlik misli ko‘rilmagan darajada jadallashgan. Birgalikdagi sa’y-harakatlar natijasida FAOning O‘zbekistondagi portfeli umumiy qiymati 65 million dollarga teng bo‘lib, 59 ta milliy, mintaqaviy va global loyihani tashkil etgan. O‘zbekiston Markaziy Osiyo tarixida ilk marotaba FAOning Yevropa uchun 32-mintaqaviy konferensiyasiga muvaffaqiyatli raislik qilgan. 2020—2030-yillarda O‘zbekiston qishloq xo‘jaligini rivojlantirish strategiyasini amalga oshirishni qo‘llab-quvvatlash uchun mamlakat va FAO o‘rtasida imzolangan Doiraviy dasturni to‘la-to‘kis amalga oshirish muhimligi qayd etilgan.
Tsuy Dunyuyom Samarqand shahridagi SHHT sammiti chog‘ida Shavkat Mirziyoyev tomonidan 2023-yili Oziq-ovqat xavfsizligi bo‘yicha xalqaro konferensiyani o‘tkazish tashabbusini qo‘llab-quvvatlagan.
FAO bosh kotibi O‘zbekistonning zamonaviy taraqqiyotini yuqori baholagan. Tashkilot oziq-ovqat xavfsizligini ta’minlash, iqlim o‘zgarishiga qarshi kurashish, qishloq xo‘jaligini diversifikatsiya qilish, suvni tejaydigan texnologiyalarni joriy etish bo‘yicha qo‘shma loyihalarni amalga oshirishda O‘zbekistonga har tomonlama yordam ko‘rsatishga tayyorligi bildirilgan.
Izoh (0)