Birlashgan Arab Amirliklarida Toshkent davlat iqtisodiyot universiteti delegatsiyasi BAAning madaniyat sport va turizm qo‘mitasi, Crowne Plaza Dubai Marina mehmonxonasi rahbariyati hamda o‘zbekistonlik fuqarolar bilan uchrashuvlar o‘tkazdi, deb xabar bermoqda “Dunyo” axborot agentligi.
Qayd etilishicha, BAAning turizm va mehmonxona tarmoqlarini rivojlantirish bo‘yicha tajribasini o‘rganish, hamkorlikda turizm sohasi mutaxassislarini tayyorlash, o‘quv dasturlari hamda darsliklarni takomillashtirish masalalari muhokama qilingan.
BAA tomoni O‘zbekistonda turizmni rivojlantirish bo‘yicha ko‘rilayotgan chora-tadbirlar, sayyohlik infratuzilmalarini rivojlantirish, turizm sohasida me’yoriy-huquqiy hujjatlar hamda investitsiya dasturlari bilan tanishtirilgan.
Crowne Plaza Dubai Marina mehmonxona rahbari T.Salxa so‘nggi yillarda O‘zbekiston hukumati tomonidan sayyohlik sohasini rivojlantirish, turistlar xavfsizligini ta’minlash va jabhada olib borilayotgan keng qamrovli islohotlarni alohida qayd etgan.
Bo‘lib o‘tgan uchrashuvlar yakunlari bo‘yicha Toshkent davlat iqtisodiyot universiteti va mehmonxona o‘rtasida turizm sohasida o‘zaro hamkorlik hamda do‘stona aloqalarni qo‘llab-quvvatlash bo‘yicha kelishuvga erishilgan. Ikki tomonlama Anglashuv memorandumi imzolangan.
Tadbir doirasida Crowne Plaza Dubai Marina mehmonxonasining o‘zbekistonlik boshqaruvchi direktori Rixsiboy Tursunovning “Be the Change in the Hospitality Industry” nomli kitobi taqdimoti o‘tkazilgan.
Izoh (0)