O‘zbekiston banklarida muammoli kreditlar ko‘payishda davom etmoqda

Markaziy bank 2022-yil 1-sentabr holatiga ko‘ra banklarning muammoli kreditlari to‘g‘risida ma’lumot berdi.

Unga ko‘ra, banklardagi jami kredit portfeli 355,5 trln so‘mgacha yetgan. Bu o‘tgan oyga nisbatan 9,1 trln so‘mga ko‘proqdir. 

Banklardagi umumiy muammoli kreditlar (NPL) miqdori qariyb 500 mlrd so‘mga ko‘payib, 17,4 trln so‘mga yetgan. Iyul oyida bu ko‘rsatkich 250 mlrd so‘mga oshgan edi. Umumiy kredit portfelidagi NPL ulushi 4,9 foizda saqlanib qolgan. 

Banklar orasida NPL miqdori eng ko‘p “Xalq bank”ida saqlanib qolmoqda va o‘tgan oyga nisbatan deyarli o‘zgarmagan — 3,5 trln so‘m. 

Muammoli kreditlarning ulushi bo‘yicha eng baland ko‘rsatkich “O‘zagroeksportbank”da — bankning jami kreditlardagi NPL ulushi 94,9 foizni tashkil qildi. 

Avvalroq O‘zbekistonda eng ko‘p ipoteka krediti ajratgan banklar ro‘yxati e’lon qilingan edi.