Toshkentda 17-sentabr kuni “ArMI—2022” o‘yinlarida muvaffaqiyatli ishtirok etgan harbiy xizmatchilarni tantanali taqdirlash marosimi bo‘lib o‘tdi. Bu haqda “Daryo”ga Mudofaa vazirligi Axborot va ommaviy kommunikatsiyalar departamenti xabar berdi.
Tantanali tadbirda Prezident Administratsiyasi va Vazirlar Mahkamasi vakillari, Oliy Majlis deputatlari, vazirlik va idoralar, davlat va jamoat tashkilotlari rahbarlari hamda ommaviy axborot vositalari xodimlari ishtirok etdi.
15—27-avgust kunlari o‘tkazilgan “ArMI—2022” harbiy musobaqalarida O‘zbekiston harbiylari 7 ta oltin, 10 ta kumush, 5 ta bronza medallariga ega bo‘lgandi. Shuningdek, 22 ta shaxsiy va jamoaviy rekord natijalarni ham qayd etib, 37 ta davlat ichida umumjamoa hisobida faxrli ikkinchi o‘rinni egalladi.
Bayramona tadbirda vazirlik va idoralar, davlat va jamoat tashkilotlari rahbarlari har bir yo‘nalish bo‘yicha navbati bilan sahnaga chiqqan harbiy jamoalarning har bir a’zosini qutlab, pul mukofotlarini topshirdi. Ya’ni, g‘olib va sovrindor bo‘lgan harbiy xizmatchilar lavozim maoshlariga mos ravishda 10, 6 va 3 baravari miqdorida pul mukofoti hamda bir pog‘ona yuqori malaka toifalari bilan rag‘batlantirildi.
Shuningdek, marosim davomida Xalqaro armiya o‘yinlarida yuqori natijalarga erishgan bir guruh harbiy xizmatchilarga muddatidan oldin navbatdagi harbiy unvonlar topshirildi.
Izoh (0)