Fotoreportaj: Italiyada kuchli bo‘ron sababli yuz bergan suv toshqini oqibatlari— suratlarda

16-avgustga o‘tar kechasi Italiyaning Adriatika dengizi sohillaridagi Marke mintaqasiga kuchli bo‘ron yopirildi, uning oqibatida suv toshqini yuzaga keldi. Mahalliy va jahon OAVlari hodisani “suv bombasi” deb atab, uni vayronkorligi jihatidan zilzilaga qiyoslamoqda. “RBK” tabiiy ofat oqibatlari haqida fotoreportaj tayyorladi.

Italiya sharqidagi Ankona provinsiyasida kuchli yomg‘ir va shamol tufayli yuz bergan suv toshqini oqibatida o‘n kishi halok bo‘ldi, yana uch kishi bedarak yo‘qoldi, ularning orasida bir nafar yosh bola ham bor, deb yozadi “Interfaks”. Ba’zi manbalarga ko‘ra, bedarak yo‘qolganlar to‘rt kishi bo‘lib, shulardan ikki nafari — bolalar. Qariyb 50 kishi kasalxonaga yotqizilgan.

Ankona provinsiyasi joylashgan Marke mintaqasida Vazirlar kengashi favqulodda holat e’lon qildi va 5 million yevro hajmidagi birinchi moliyalashtirish transhini tasdiqladi. Ushbu provinsiya eng ko‘p zarar ko‘rgani aytilmoqda: yer o‘pirilishlari kuzatilgan, yo‘llar buzilgan, “tez yordam” mashinalari esa qiyinchilik bilan harakatlanmoqda.

Fuqarolar himoyasi departamenti rahbari Fabritsio Kursio ma’lum qilishicha, jabr ko‘rgan mintaqada bir soat ichida bir yillik yog‘ingarchilik me’yorining qariyb uchdan bir qismi yog‘gan, ba’zi tumanlarda esa butun yoz bo‘yi yog‘gan yomg‘irdan ikki baravar ko‘p yog‘ingarchilik bo‘lgan.

Shuningdek, ta’kidlanishicha, vaqtinchalik joylashuv punktlariga allaqachon 150 kishi joylashtirilgan, ularning soni ortib bormoqda.

Infratuzilmaga ham sezilarli darajada zarar yetgan. Daryo toshib ketishi oqibatida Senigalliyaning tarixiy markazidagi Garibaldi ko‘prigining toshdan yasalgan naqshinkor panjaralari zarar ko‘rgan.

Pezaro-e-Urbino provinsiyasining Kantiano shahrida esa 50 ga yaqin uylar suv ostida qolib, qariyb 40 ta mashinani suv oqizib ketgan, shahar ichimlik suvi, gaz va elektrsiz qolgan. Pergolada 20 ta uy suvga g‘arq bo‘lgan, ko‘plab oilalar evakuatsiya qilingan.

Markeda suv toshqinlari qurbonlari xotirasiga ikki kunlik motam e’lon qilindi.

Italiyaning The Local nashri xabariga ko‘ra, shu yil yozda ekstremal ob-havo hodisalari o‘n yil avvalgiga nisbatan besh marta ko‘proq qayd etilgan. “Ekstremal tabiat hodisalari soni oshishi natijasida qishloq xo‘jaligiga 2022-yilda 6 milliard yevrodan ko‘proq zarar yetdi, bu YaMMning 10 foizi demakdir”, — deya ma’lum qildi Italiya fermerlar assotsiatsiyasi.