Tashqi ishlar vaziri Vladimir Norov va SHHT bosh kotibi Chjan Min ishtirokida SHHT sammiti yakunlari bo‘yicha brifing o‘tkazildi. Bu haqda vazirlik axborot xizmati xabar berdi.
“Muzokaralar yakunlari bo‘yicha rekord miqdordagi hujjatlar — 40 dan ortiq bitim, konsepsiya, dastur va boshqa qarorlar qabul qilindi, ular SHHT faoliyatining istiqbolli yo‘nalishlari bo‘yicha hamkorlikni sifat jihatidan yangi amaliy mazmun bilan to‘ldirishga xizmat qiladi”, — dedi Vladimir Norov brifingda.
Uning so‘zlariga ko‘ra, Shavkat Mirziyoyev SHHT makonida inqirozli vaziyatlarni birgalikda bartaraf etish va barqaror rivojlanishga erishish uchun iqtisodiyot, savdo va investitisiya sohalarida hamkorlikni kengaytirish zarurligini ta’kidlagan.
Shu munosabat bilan o‘zgaruvchan zamonaviy voqelik sharoitida amaliy hamkorlikning samarali modellarini shakllantirishga qaratilgan SHHTning keng formatli yangi iqtisodiy muloqotini boshlash tashabbusi ilgari surildi.
Prezident tomonidan yangi — “Umumiy xavfsizlik va farovonlik yo‘lidagi Samarqand birdamligi tashabbusi”ning ilgari surilishi yetakchilarning bu galgi uchrashuvidagi muhim voqealardan biri bo‘ldi. Sammit ishtirokchilari tinchlik va barqarorlikni, keng xalqaro hamkorlikni ta’minlash va insoniyatning barqaror rivojlanishiga ko‘maklashishga qaratilgan ushbu tashabbusni bir ovozdan ma’qulladi. Davlatimiz rahbari “Samarqand tashabbusi”ning birinchi xalqaro forumini kelasi yili shu yerda — qadimiy va hamisha navqiron Samarqand shahrida o‘tkazishni taklif qildi, — deydi Norov.
Ta’kidlanishicha, Shanxay hamkorlik tashkiloti davlatlarining iqlim o‘zgarishiga qarshi kurashda hamjihatligi O‘zbekiston prezidentining tashkilotga a’zo davlatlar rahbarlari kengashi nomidan Pokistondagi suv toshqinlarining halokatli oqibatlarini bartaraf etishda ushbu mamlakatni har tomonlama yordam berish orqali qo‘llab-quvvatlash bo‘yicha jahon hamjamiyatiga murojaatida ham o‘z ifodasini topdi.
O‘zbekiston raisligida SHHTga ishtirokchilari safini kengaytirish masalasida sezilarli yutuqlarga erishildi. Eronning majburiyatlari to‘g‘risidagi memorandum imzolandi. Mazkur hujjat ushbu mamlakatning SHHTga to‘laqonli a’zoligiga to‘g‘ridan to‘g‘ri yo‘l ochadi.Uning so‘zlariga ko‘ra, SHHT sammiti o‘zaro bog‘liqlik kuchayib borayotgan sharoitda mintaqaviy va global kun tartibining dolzarb masalalarini konstruktiv muhokama qilish uchun o‘z vaqtida va samarali xalqaro platforma bo‘lib xizmat qildi, shuningdek, barqarorlik, xavfsizlik va rivojlanishni ta’minlash manfaatlari yo‘lida ko‘p tomonlama hamkorlikni mustahkamlash uchun yangi yo‘llarni aniqlash imkonini berdi.Tegishli memorandumlarni imzolash bilan Misr va Qatarning SHHT muloqot bo‘yicha hamkori maqomini huquqiy rasmiylashtirish yakunlandi. Belarusni tashkilotning to‘liq a’zosi sifatida qabul qilishni boshlash to‘g‘risida qaror qabul qilindi. Davlat rahbarlari, shuningdek, Bahrayn, Maldiv orollari, Birlashgan Arab Amirliklari, Quvayt va Myanmaning SHHT muloqoti bo‘yicha hamkor maqomi haqidagi so'rovlarini qo‘llab-quvvatladi, — dedi TIV rahbari.
Izoh (0)