“Daryo” muxbirlari O‘zbekistonda xizmat ko‘rsatgan artist Mashrab Kimsanov og‘ir xastalikka chalingani haqidagi xabarni eshitib, bemor holidan xabar olgani bordi. Aktyorning rafiqasi Adolat Kimsanova turmush o‘rtog‘ining xastaligi haqida quyidagilarni so‘zlab berdi.
— Hayot tashvishlari ba’zan eng kuchli insonni ham yengib qo‘yar ekan. Ba’zi insonlar e’tibor berishmaydi yoki o‘zlarini boshqa yumushlar bilan chalg‘itishadi. Menimcha, turmush o‘rtog‘im ana shunday tashvishlarni ko‘ngliga og‘ir oldi. Umr bo‘yi “Kino yaxshi bo‘lib ketadi”, degan umid bilan kunni kunga uladi. Meni hamisha “Hali zo‘r rollar ijro etamiz, qiyinchiliklar ortga qoladi”, deb yupatardi-yu, ammo o‘zi bunga amal qilmadi. Mashrab Kimsanov Rossiyada tahsil olgan, professional kino mutaxassisi hisoblanadi. Bunday ilmli va katta tajribaga ega bo‘lgan inson ko‘chadan olib kelingan odamlarga rol berishayotganini ko‘rib, yuragiga og‘ir olardi.
Hatto undan ba’zi rejissorlar bepul rol ijro etishini so‘ragan paytlar ham ko‘p bo‘ldi. Ammo o‘shanda ham nolimay “Mayli kino-ku”, deb rollarini sidqidildan ijro etardi. Ammo baribir yillar davomida ko‘nglida yig‘ilgan kemtiklar kun kelib katta kasallikka chalinishiga sabab bo‘ldi. 2018-yil ilk insultni boshidan o‘tkazdi. Hassaga tayanib bo‘lsa-da, o‘tgan yili kinofestivallarga olib bordim. Aktyorlar qatorida yurgani ham u insonga ancha dalda bo‘ldi. “Endi festivallar bo‘lyapti, kino ham yaxshi bo‘lib ketadi”, deb ko‘ngli ko‘tarildi.
Shuncha yil yashab, oilamizda biror mojaro bo‘lgan emas. Ammo yana ketma-ket ikki marta insultni boshidan o‘tkazdi. Qaynanamning vafotidan keyin ota uyi Yaypanga borib, o‘sha yerda to‘rtinchi insultga chalindi. To‘shakka mixlanib, oyoq-qo‘llari ishlamay qoldi. Bunday bemorlarni joyidan ko‘chirib bo‘lmaydi deyishgani uchun bir muddat vodiyda davolatdik. Undan keyin Toshkentga olib kelib, bu yerda ham uzoq muolajalarni oldi. Ammo hozircha o‘zgarish yo‘q. Umidim bor, yurgan oyoqlar yana yurib ketishiga ishonaman. Suyanchiq yordamida bir-ikki qadam tashlaganiga ham xursand bo‘laman. Ilgari kasalni boqish osonmas, deyishsa tushunmagan ekanman. To‘shakka mixlanib qolganidan keyin bu gaplarning mag‘zini chaqyapman. Xudoga shukr, avvalgidan ahvoli ancha yaxshilandi.
Yaxshi hamki shogirdlarim bor ekan, ba’zan syomkalarga chaqirib turishadi. Mashrab akaning bosh tomoniga yeguliklar, oyoq tomoniga esa hojatga kerakli narsalarni qo‘yib, bir-ikki soatlik syomkalarga borib kelaman. Qaytganimdan keyin “Yaxshimi, nima bo‘ldi?” deb so‘raydi. Shu ahvolda ham syomkalarni gapirsam quvonib ketadi. Baribir ijodkorda, bu gaplar uni suyuntiradi.“O‘zbekkino”, “O‘zbekfilm” degan tashkilotlar umuman xabar olishmaydi, ishlari ham yo‘q. Kino arboblari uyushmasidan bir-ikki marta xabar olishdi. Har zamonda aktyor Rajab Adashev qo‘ng‘iroq qilib turadi. Bu yilgi bayramda kimdir kelar, hech bo‘lmasa qo‘ng‘iroq qilar deb kutdim. Ammo jimjit.
Aktyor yurib tursa hammaga kerak, yotib qolsa butunlay unutib yuborilar ekan. Men-ku, mayli menga e’tibor berishsin demayman, ammo umrni va salomatligini kino rivoji uchun sarflagan insonga hech bo‘lmasa bayram kuni bitta ko‘krak nishon berish kimni o‘ldiribdi? Ko‘ryapman, ba’zilarga ikki martadan mukofot berishyapti, — deydi aktrisa Adolat Kimsanova.
Bu yerda videoni to‘liq tomosha qilishingiz mumkin.
Eslatib o‘tamiz, O‘zbekistonda xizmat ko‘rsatgan artist Mashrab Kimsanov 1955-yili Farg‘ona viloyatida tavallud topgan. “Otamdan qolgan dalalar”, “Vodillik kelin”, “Olovli yo‘llar”kabi 40 dan ortiq filmlardan ajoyib rollarni ijro etgan. Rejissor sifatida esa “Tog‘lik kuyov” va “Besh qismat” nomli filmlarni suratga olgan.
Mavzuga doir:
Izoh (0)