“Daryo” nashri 16-sentabrda O‘zbekiston va jahonda sodir bo'lgan eng muhim voqealarni e’tiboringizga havola etadi.
SHHT sammiti doirasida bildirilgan davlat rahbarlarining fikrlari bilan tanishamiz.Pokiston yetakchisi o‘z nutqida mamlakatdagi talafotlarni eslatib o‘tdi va Pokiston toshqin sabab katta dengizga o‘xshab qolganini ta’kidladi.
Rossiya prezidenti Vladimir Putin esa terrorizm va ekstremizm, giyohvand moddalar savdosi va noqonuniy qurolli guruhlarga qarshi kurash ustuvor vazifalardan biri bo‘lganini va bundan keyin ham shunday bo‘lib qolishini bildirib o‘tdi.
Shuningdek, SHHT Mintaqaviy aksilterror tuzilmasi Ijroiya qo‘mitasi direktori Ruslan Mirzayevning so‘zlariga ko‘ra, yaxshi muvofiqlashtirilgan ishlar natijasida 2021-yilda SHHTga a’zo davlatlarda birorta terakt sodir bo‘lmadi.
Qozog'iston Prezidenti Qosim Jo'mart To'qayev "Bizning g‘oyalarimizda qarama-qarshilik va blok yo‘q, shu bois tashkilot geografiyasi tabiiy ravishda yildan-yilga o‘sib bormoqda”, - deya ta'kidlagan.
“AQSh bezorilarcha o‘z qonunlarini xalqaro hamjamiyatga buyurmoqda. Ular boshqa davlatlarga bosim o‘tkazish uchun turli vositalardan foydalanadi. Shanxay hamkorlik tashkiloti bu biryoqlama yondashuvga qarshi kurashishi kerak. Bank sohasida savdo sheriklik va infratuzilmani mustahkamlash muhim ahamiyatga ega. Biz hamkorlik orqali adolatli dunyo yaratish markazida bo‘lishni maqsad qilganmiz”, — deydi Eron prezidenti Ibrohim Raisiy.
O'z o'rnida Turkiya prezidenti Rajab Toyyib Erdo'g'an ham "Bizning muloqot bo‘yicha hamkor maqomimiz tufayli so‘nggi 10 yil ichida SHHT Osiyoga ochilgan derazalarimizdan biriga aylandi. SHHT Osiyo mintaqasidagi ishonchli platformadir. Uning faoliyati bois biz bag‘rikenglik, o‘zaro yordam va hamkorlik g‘oyalarini targ‘ib etyapmiz" - deya fikr bildirdi.
O'zbekiston davlat rahbari Shavkat Mirziyoyev o‘zaro ishonch, adolat va hamjihatlikka talab global miqyosda tobora ortib borayotganini ta'kidlagan holda, Afg‘onistonni gumanitar qo‘llab-quvvatlash bo‘yicha maxsus fond ta’sis etishni taklif qildi.
Putin va Si Szinpin Samarqandda uchrashdi
15-sentabr kuni Rossiya prezidenti Vladimir Putin va Xitoy Xalq Respublikasi (XXR) raisi Si Szinpin Samarqandda Shanxay hamkorlik tashkiloti (SHHT) sammiti doirasida uchrashdi, deb yozadi Meduza.
Uchrashuv boshida Putin Xitoy vakillariga “Ukraina inqirozi” bo‘yicha masalalarni ochiqlashga va’da berdi.
“Aytish kerakki, bir qutbli dunyoni yuzaga keltirishga urinishlar so‘nggi vaqtlarda mutlaqo xunuk qiyofa kasb etdi va sayyoradagi davlatlarning aksariyati uchun nomaqbul bo‘lib qoldi. Xitoylik do‘stlarimizning Ukraina inqirozi yuzasidan muvozanatlashgan pozitsiyasini yuqori baholaymiz, sizning bu boradagi savollaringiz va xavotiringizni tushunamiz, va bugungi uchrashuv davomida, albatta, ushbu masala bo‘yicha pozitsiyamizni ochiqlab o‘taman, garchi biz bu haqda avval ham gaplashgan bo‘lsak-da”, — dedi Putin
SHHT Samarqand sammiti O‘zbekistonning katta diplomatik g‘alabasidir — Le Figaro
Fransiyaning Le Figaro nashri Shanxay Hamkorlik Tashkilotining Samarqand sammiti haqida yozar ekan, uning ikkita muhim jihatiga e’tibor qaratdi. Birinchidan, bu Xitoy rahbari Si Szinpinning pandemiya boshlangandan beri ilk xorijiy safari bo‘lib, u, jumladan, Rossiya prezidenti Vladimir Putin bilan uchrashadi. Ikkinchidan, SHHT ko‘lami bo‘yicha BMTdan keyin turadigan yirik mintaqaviy tuzilmadir. Bu tashkilot zaminida dunyo aholisining 42 foizi istiqomat qiladi.
SHHT Yevropa Ittifoqi singari siyosiy tashkilot ham, NATO kabi harbiy blok ham emas, deb yozadi nashr. SHHTda O‘zbekiston alohida o‘ringa ega. Tashkilotga yaqinga qadar O‘zbekiston vakili, hozirda mamlakat tashqi ishlar vaziri Vladimir Norov rahbarlik qildi, sammitning Samarqandda o‘tkazilishi ham bejizga emas. Bu O‘zbekistonning katta diplomatik g‘alabasidir, deyiladi nashr maqolasida.
Le Figaro ekspertlarining ta’kidlashicha, O‘zbekiston chindan ham xalqaro munosabatlarning katta “shaxmat doskasi”da muhim o‘rin tutadi. Mamlakat Putinning Ukrainadagi urushini qo‘llab-quvvatlamaydi, bundan tashqari, u ehtiyotkorona tashqi siyosati tufayli Rossiya bilan ham, Xitoy bilan ham bir xil munosabatlarni saqlab qolmoqda. O‘zbek diplomatiyasi faol va ko‘pqirralidir.
Qirg‘iziston va Tojikiston prezidentlari chegaradagi vaziyat yuzasidan yuzma-yuz muzokara o‘tkazdi
Ikki davlat rahbarlari tegishli tuzilmalarga o‘t ochishni to‘xtatish, qo‘shin va vositalarni to‘qnashuv chizig‘idan olib chiqish bo‘yicha ko‘rsatmalar berishga kelishib oldi.
Izoh (0)