15-sentabr kuni “O‘zbekiston” anjumanlar saroyida “Ipak yo‘li durdonasi” XIV Toshkent xalqaro kinofestivali doirasida “Turkiya kinosi kunlari”ning ochilish marosimi hamda kino ijodkorlar ishtirokida ijodiy kecha bo‘lib o‘tdi. “Daryo” muxbirlari mazkur kechada ishtirok etib, foto va videoreportaj tayyorlashdi.
Turk kinosini qadrlovchi minglab o‘zbek tomoshabinlari tadbir boshlanishidan ancha avvalroq “O‘zbekiston” anjumanlar saroyida qarshisida to‘planishdi.
Kirish yo‘laklari ana shunday qizil gilamlar va rang-barang chiroqlar bilan bezatildi.
Tadbirda kinoyulduzlar, taniqli rejissorlar, o‘zbek san’ati vakillari, turk kinosi muxlislari hamda OAV vakillari ishtirok etdi.
Tadbir davomida O‘zbekiston Kinematografiya agentligi rahbari Firdavs Abduxoliqov so‘zga chiqdi. Uning qayd etishicha, festival davomida namoyish etiladigan filmlarning 3 tasi turk kinosidir. Kelgusida ham turk kinosi vakillari bilan hamkorlik izchil davom etadi.
Burak O‘zchivitning navbatdagi tashrifi ham shovqin-suronli bo‘ldi. Ya’ni uni bu gal ham muxlislari xotirjamlikda qarshi olishmadi.
O‘zbek aktrisalari turkiyalik hamkasblari bilan uchrashuvni tarixga muhrlashdi.
Kecha “Daryo” kameralari nishoniga tushmagan aktrisa Rayhon Ulasenova “Turk kino kunlari”ning ochilish marosimiga katta qizi va hamkasbi Sitora Farmonova bilan birga tashrif buyurdi.
Zal tomoshabinlar bilan to‘ldi.
Sahnaga turk kinoyulduzlari Mustafo Ug‘ur Yag‘chiog‘lu, Pinar Yazchiog‘lu, Nazif Tunch, Murad Aydin, Azra Akin, Gizem Lidiya Denizchi, Sevdar Goo‘kxan, Chelal Al, Tuba Unsul, Nurgul Yeshilchay, Burak O‘zchivit sahnaga taklif etildi.
Burak O‘zchivit “Sevgi iztirobi”dagi raqibi Amirni o‘zbekchada gapirtirgan aktyor Alisher Uzoqov bilan sahnaga chiqdi.
Tadbir davomida tomoshabinlar va turk kinosi vakillari o‘rtasida erkin muloqot tashkil etildi.
Alisher Uzoqov va Burak O‘zchivit kichik sahna ko‘rinishini jonlantirishdi. Bu chiqish ikki millat tomoshabinlariga xush kayfiyat ulashdi.
Nurgul Yeshilchay sahnadagi o‘rindiqda o‘zini qirolichadek his qilayotganini va unga faqatgina toj yetishmayotganini aytib, hazil qildi. Tabdirga boshlovchilik qilgan aktrisa Shahzoda Muhammedova unga boshidagi bejirim tojni tuhfa etdi.
Nurgul Yeshilchay ham muxlislari bilan erkin muloqotga kirishib, ularni qiziqtirgan bir nechta savollarga javob berdi.
Yoqimtoy bloger Erali tadbirda singlisi bilan tashrif buyurdi. U singlisiga Burak O‘zchivit bilan uchrashish va unga qo‘shiq kuylab berish baxtini tuhfa etdi.
Aktrisa Barchin G‘ofurova turk kinosining shaydosi emasligi va Burak O‘zchivitni unchalik yoqtirmasligini aytib o‘tdi.
“Turk kino kunlari”ning ochilish marosimiga bir guruh san’atkorlar ham tashrif buyurishdi. Ular “Daryo” muxbiri bilan festival taassurotlarini o‘rtoqlashishdi.
Afsuski, turk kinoijodkorlari o‘rtasidagi birozgina tushunmovchilik tadbir fayziga ham o‘z ta’sirini o‘tkazmay qolmadi. Jurnalist va tadbir tashkilotchisi bo‘lgan Shoira Raufboyeva o‘zining Facebook’dagi sahifasiga turk kinoijodkorlari o‘rtasida ro‘y bergan sovuq vaziyat, o‘zbek ijodkorlariga o‘rnak bo‘lishi kerakligi haqida yozib qoldirdi:
Turkiyadan tashrif buyurgan 9 ta aktyor sahnaga chiqib, tomoshabinlar bilan yuzma-yuz bo‘lishdi. Lekin o‘zbek “burakshunoslari” va Yashilchoy muxlislari tadbirni yarmini ularni kutib, ko‘chada o‘tkazishgani, boshlovchilar ikki qayta tantana bilan e’lon qilishsa-da, ular sahnaga chiqmadi. Va nihoyat Nurgul Yeshilchay sahnani bir burchagidan chiqib, o‘sha yerda qotdi. Hamyurt hamkasblariga nazar tashladi-yu, ikki qo‘lini cho‘ntagiga solib, g‘oz turib oldi. Uzatilgan mikrofonni ham qo‘liga olishni ep ko‘rmay, boshlovchining qo‘lidagi mikrofonga egilib, “Salom, yaxshimisizlar?” deb boshqa aktyorlar yoniga borib o‘tirmasdan, sahna ortiga o‘tib ketdi. Oybek Veysal o‘g‘li to‘qqizta aktyor bilan birma-bir samimiy suhbat qildi, lekin Yashilchoy qaytmadi. Burak-ku umuman ko‘rinmadi.To‘liq reportajni quyida tomosha qilishingiz mumkin.Ko‘nglimning bir chekkasidan “U shunchalik mashhurmikan, to‘qqizta hamkasbini mensimadi-ya”, degan fikr o‘tdi. Sahnadagilarni sovg‘a-salomlar bilan o‘rinlariga kuzatib qo‘yishgachgina Nurgul sahnaga chiqib keldi va uning boshiga boshlovchining tojini kiydirib, endi shou boshlanayotgan edi, 58 yildan beri kino san’atiga halol xizmat qilib, sochi oqargan, o‘zining ta’biricha “podshodan qulgacha” barcha rollarni o‘ynagan Sevdar Go‘kxan sahnaga otilib chiqib, “Tomoshamizni buzdi deb mendan xafa bo‘lmang. Ming afsus, mana bu oyog‘i yerdan uzilgan ikki hamkasbimiz sahnada biz bilan birga o‘tirishdan or qildi, aslida ular bizning safimizda bo‘lishga noloyiq. Siz odamning qiyofasiga qarab baho bermang, uning kimligini xatti-harakatlari bildirib turadi. Biz ortiq bu ikkisining ahmoqona tomoshasini ko‘rib, haqoratni jimgina yutib keta olmaymiz. Biz bu yerni hoziroq tark etamiz”, — deb to‘qqiz turk ijodkori bilan zalni tark etishdi. Ularning ortidan elchixona vakillari ham chiqib ketishdi va shu bilan bugungi tadbirning fayzini ham olib ketishdi.
Izoh (0)