Ukraina prezidenti Vladimir Zelenskiyning korteji Kiyevda halokatga uchradi, deb yozadi “RBK” davlat rahbarining matbuot kotibi Sergey Nikiforovga tayanib.
“Kiyevda yengil mashina Ukraina prezidentining avtomobili va hamrohlik qiluvchi mashinalar bilan to‘qnashib ketdi… Prezidentni shifokor ko‘rikdan o‘tkazdi, jiddiy shikastlanishlar aniqlanmadi”, — deb yozdi u.
Prezident korteji bilan to‘qnashgan yengil avtomobil haydovchisi jarohatlar olgan. Prezidentga hamrohlik qilgan shifokorlar unga birinchi yordamni ko‘rsatgan, so‘ng “tez yordam” xodimlariga topshirgan.
Nikiforovning so‘zlariga ko‘ra, hodisa huquq-tartibot organlari tomonidan tekshiriladi. Matbuot kotibi boshqa tafsilotlarni keltirmadi.
Zelenskiy Kiyevga Xarkov viloyatining Izyum shahridan yetib kelgan. 14-sentabr kuni Vladimir Zelenskiy Ukraina Qurolli kuchlari tomonidan qarshi hujum paytida ozod qilingan Xarkov viloyatining Izyum shahriga kelgan edi. Izyum aprel boshida Rossiya qo‘shinlari tomonidan egallangan edi. Ukraina Qurolli kuchlari sentabr oyi boshida Xarkov va Xerson viloyatlarida boshlangan keng ko‘lamli qarshi hujum davomida shahar ustidan nazoratni qaytarib oldi. Izyum ma’muriyatining ma’lum qilishicha, shahar uchun janglar va okkupatsiya paytida kamida ming nafar mahalliy aholi halok bo‘lgan, bu hisobga tibbiy yordam olish imkoniyati yo‘qligi sabab vafot etganlar kiritilmagan.
Zelenskiyning korteji 2019-yil iyulida ham halokatga uchragan edi, o‘shanda u Zaporojye viloyatida bolalarni olib ketayotgan bir nechta avtobuslar bilan to‘qnashgan. Kortej tarkibidagi bir mikroavtobusga zarar yetgan, avariya natijasida hech kim jabrlanmagan edi. Zelenskiyning o‘zi halokat joyida bo‘lmagan, u Kiyevga samolyotda uchib ketgan.
Izoh (0)