“Konfutsiy ta’limoti bizning milliy g‘oyalarimizga juda mos keladi”. Konfutsiy instituti direktori Shahriyor Safarov bilan suhbat

Samarqand shahrida Konfutsiy xiyoboni ochiladi. Shu munosabat bilan Konfutsiy instituti direktori Shahriyor Safarov muzeyning qurilish jarayoni, tashkil etilish sabablari borasida “Daryo” muxbiriga kichik intervyu berdi.

Shahriyor Safarovning aytishicha, Samarqandda Konfutsiy maydoni qurilishi, qadimgi xitoy faylasufiga atab haykal qo‘yilishining asosiy tashabbuskori — Shavkat Mirziyoyev. Davlat rahbari Shanxay universiteti hovlisida Alisher Navoiy haykali qo‘yilganini eshitib, Samarqandda shunga o‘xshash majmua qurish topshirig‘ini bergan.

“Xitoylik hamda o‘zbekistonlik me’morlar hamkorligida mana shu maydon tashkil etildi. Maydon katta ramziy ma’noga ega. Aslida ‘Bilimlar dargohi’ deb ataladi. Kirish darvozasi peshtog‘ida ‘Eng buyuk mutafakkir va donishmand ustozga’ deb yozilgan. Chunki xitoy xalqining Konfutsiyga bo‘lgan ehtiromi juda katta. Uning ta’limoti xitoy xalqining asosiy hayot ramziga aylangan.

Uning qayd etishicha, maydondagi marmar plitkalarda iyerogliflar bor bo‘lib, ularda yozuvlar mavjud. Yozuvlarda Konfutsiy g‘oyalari aks etgan.

“Bularning hammasida insonparvarlik, muhabbat, mehr, haqiqat, adolat kabi ta’limotlar yozilgan. Konfutsiy g‘oyalari bizning milliy g‘oyalarimizga juda mos keladi. Ko‘p jihatdan bir-biri bilan uyg‘unlashib ketgan”, — deydi u.