Eronning SHHTga a’zo bo‘lishi nima uchun muhim?

Eron Islom respublikasining Shanxay Hamkorlik Tashkilotiga a’zo davlat maqomini olish uchun majburiyatlari to‘g‘risidagi memorandum imzolandi.

Xususan, SHHT bosh kotibi Chjan Ming 15-sentabrni Eron uchun ham, tashkilot uchun ham muhim kun deya ta’kidladi. Eronning ishtirokchi davlatlar guruhiga kirishi Shanxay hamkorlik tashkilotini mustahkamlaydi. Memorandumda ko‘zda tutilgan barcha majburiyatlar bajarilgach, Eron Islom respublikasi SHHTning to‘laqonli a’zosiga aylanadi.

Eron SHHTga qachon to‘laqonli a’zo bo‘ladi?

“2005-yilda Eron SHHTda kuzatuvchi davlatga aylandi. Mamlakatning tashkilotga to‘laqonli a’zoligiga kirish jarayoni 2021-yilda boshlangan.

SHHTning Samarqand sammitida esa Eron Islom Respublikasining Tashkilotga a’zo davlat maqomini olish majburiyatlari to‘g‘risidagi memorandum imzolandi.

Bu Eronning Tashkilotga to‘laqonli a’zo bo‘lishini anglatmaydi. Gap shundaki, bugun imzolangan memorandumga ko‘ra, rasmiy Tehron Tashkilot xartiyasidan kelib chiqib tegishli majburiyatlarni bajarishi va qator hujjatlarni ratifikatsiya qilishi kerak bo‘ladi.

Bu vazifalar to‘liq bajarilgandan keyin Eron to‘laqonli a’zo sifatida qabul qilinadi”, – ta’kidladi milliy koordinator.

Respublika maydoni bo‘yicha dunyoda 17-o‘rinni egallaydi; aholisi — 85,5 million nafarga yaqin.

Eronning dunyodagi obro‘si yil sayin ortib bormoqda. Avvalo, bu uning o‘tgan asrning eng muhim strategik manbasiga aylangan va hozirgi davrda ahamiyati oshgan uglevodorodlarni global ishlab chiqarishdagi roli bilan bog‘liq. British Petroleum ma’lumotlariga ko‘ra, Eron tabiiy gaz zaxiralari bo‘yicha dunyoda 2-o‘rinda (Rossiyadan keyin), tasdiqlangan neft zaxiralari bo‘yicha 4-o‘rinda va uni ishlab chiqarish bo‘yicha 7-o‘rinda turadi.

Bugungi kunga kelib Eron dunyoning ko‘plab mamlakatlari bilan aloqalar o‘rnatgan. Shu bilan birga, uning tashqi siyosatida Markaziy Osiyo yo‘nalishi asosiy yo‘nalishlardan biri hisoblanadi.

Tahlilchilarning ta’kidlashicha, Eronning SHHT faoliyatida to‘liq ishtirok etishi tashkilot Xartiyasi maqsadlariga to‘liq mos keladi, ushbu makromintaqaviy birlashmaning barcha ishtirokchilari manfaatlariga javob beradi va o‘zaro manfaatli hamkorlikka katta turtki beradi.

#SCO2022Samarkand