“Xotini va qaynonasi voqea joyida vafot etgan”. Andijondagi qotillik haqida qo‘shimcha ma’lumot berildi

Andijon viloyatining Izboskan tumanida 22 yoshli ayol, uni himoya qilishga uringan onasi va 12 yoshli ukasi o‘ldirilgani haqida xabar berilgandi. Bloger Nurbek Alimovning qo‘shimcha qilishicha, Bosh prokuratura qotillik voqeasiga aniqlik kiritgan.

Ta’kidlanishicha, qotillik voqeasi 2022-yilning 12-sentabr kuni sodir bo‘lgan. Shu kuni Izboskan tumanining “To‘rtko‘l” MFY, Oltin vodiy ko‘chasida yashovchi fuqaro tuman IIBning navbatchilik qismiga qo‘ng‘iroq qilib, qo‘shnisining xonadonidan janjal ovozini eshitganini, hovlida xonadon egasi uning qizi qonga belanib yotganini aytganini bildirgan.

“Aniqlanishicha, joriy yilning 12-sentabr kuni soat 21:30 larda, Izboskan tumani ‘To‘rtko‘l’ MFY, Xotira ko‘chasida yashovchi A.A oilaviy kelishmovchiliklar tufayli onasining uyida yashab kelayotgan turmush o‘rtog‘i SH.R. va 2021-yilda tug‘ilgan farzandi bilan ko‘rishish maqsadida qaynonasining uyiga borgan. Biroq farzandini ko‘rishga qarshilik qilganligi uchun qaynonasi M.R hamda turmush o‘rtog‘i SH.R. bilan janjallashib qolgan. Shundan so‘ng somsaxonaga borib, u yerdan o‘zi bilan xo‘jalik pichog‘ini olib kelgan. Va qaynonasi, turmush o‘rtog‘i, shuningdek, janjalga keyin qo‘shilgan 12 yoshli qaynukasiga pichoq bilan jarohat yetkazgan. Jarohatlar sabab uning qaynonasi va xotini hodisa joyining o‘zida vafot etgan. Voyaga yetmagan X.R. esa tuman markaziy kasalxonasiga olib borilgan va shifokorlar tomonidan barcha tibbiy muolajalar amalga oshirilmoqda”, — deyiladi Bosh prokuratura ma’lumotida.

Qayd etilishicha, mazkur holat yuzasidan viloyat prokuraturasi tomonidan A.A.ga nisbatan Jinoyat kodeksining 97-moddasi 2-qismi “a” bandi (ikki yoki undan ortiq shaxsni qasddan o‘ldirish) bilan jinoyat ishi qo‘zg‘atilib, gumondor ushlangan.

Jinoyat ishining tergov harakatlari viloyat prokuraturasining o‘ta og‘ir jinoyatlarni tergov qilish bo‘limi tomonidan olib borilmoqda.