O‘FA Tartib-intizom qo‘mitasida 14-sentabr, chorshanba kuni “Navbahor” bosh murabbiyi Samvel Babayan va “Championat.asia” muxbiri o‘rtasida yuzaga kelgan kelishmovchilik bo‘yicha ish ko‘rib chiqildi.
Qarorga ko‘ra, qo‘mita Babayanning xatti-harakatlarini etikaga zid deb hisobladi va unga jarima intizom chorasi qo‘lladi.
Ma’lum bo‘lishicha, Superliga doirasida kechgan “So‘g‘diyona” — “Navbahor” uchrashuvi yakunlangandan so‘ng namanganliklar bosh murabbiyi Samvel Babayan matbuot anjumani zaliga kirish chog‘ida mahalliy muxlis bilan tortishib qolgan.
Mutaxassis mazkur holatni o‘zining telefoni orqali video tasvirga tushirib turgan “Championat.asia” sayti fotomuxbiri Jahongir Fayzullayevni ko‘rib qolgan va o‘z yordamchilariga ushbu telefonga yozilgan video materialni o‘chirishni buyurgan. Yordamchilari jurnalistga tazyiq o‘tkazib, telefondagi yozuvlarni o‘chirtirishga majbur qilgan.
Mazkur vaziyat Tartib-intizom qo‘mitasining yig‘ilishida “Navbahor” futbol klubi bosh murabbiyi Samvel Babayan, “Championat.asia” sayti fotomuxbiri Jahongir Fayzullayev, ushbu sayt jurnalisti Faxriddin Ro‘ziyev ishtirokida ko‘rib chiqildi. Yig‘ilishda taraflarning ko‘rsatmalari, taqdim etilgan ma’lumotlar asosida Samvel Babayan etika qoidalariga zid xatti-harakatlar sodir etgan deb topildi.Avvalroq PFL mazkur holat yuzasidan bayonot bergandi. Unda ish Tartib-intizom qo‘mitasiga oshirilgani va unga qadar murabbiyning litsenziyasi olib qo‘yilishini ma’lum qilgandi. PFL bayonotida jurnalistga tazyiq o‘tkazgan shaxs Farhod Umaraliyev ekani va bu harakat uchun uning akkreditatsiyasi olib qo‘yilganini ma’lum qilgandi.Tartib-intizom qo‘mitasining qaroriga ko‘ra, Samvel Babayanga nisbatan jarima intizom chorasi qo‘llanildi, — deyiladi O‘FA bayonotida.
Izoh (0)