Shahzoda Charlz (hozirgi qirol Charlz III) va Kamilla Parker-Boulz 2005-yilda turmush qurgan. Ammo ular orasidagi muhabbat tarixi o‘tgan asrning yetmishinchi yillarida boshlanganini ko‘pchilik bilmaydi, deb yozadi The Voice Mag.
2005-yil 9-aprel — Kamilla Parker-Boulz hayotida hali bunchalar baxtli kun bo‘lmagan. Ha, u nihoyat 35 yil oldin sevib qolgan insoniga turmushga chiqayotgan edi. Shu tarzda Kamillanng Charlz bilan hikoyasi boshlandi.
Hammasi qanday boshlandi?
Kamilla va Charlz 1970-yilda qirolichaning to‘ng‘ich o‘g‘li o‘sha paytda qatnashishni yaxshi ko‘rgan ijtimoiy tadbirlardan birida uchrashdi. Ajablanarlisi shundaki, Kamilla Charlzga to‘g‘ridan to‘g‘ri shunday dedi: “Mening buvim bilan sizning bobongiz o‘rtasidagi munosabatdan xabaringiz bo‘lganmi? Balki biz ham sinab ko‘rarmiz?”
Albatta, Charlz bunga qarshilik bildirmadi, munosabatlar tez rivojlandi. Shahzoda vaqt kelganda qirolicha unga turmush o‘rtoqni o‘zi tanlashini bilsa-da, Kamilla bilan jiddiy munosabatga kirishdi.
Biroq kutilmagan voqea yuz berdi, Charlz haqiqatan ham sevib qoldi. Kamilla o‘zining xushmuomalaligi va hazilkashligi bilan shahzodaning ko‘nglini zabt etdi. Ammo u ofitser Endryu Parker-Boulz bilan munosabatda bo‘lgan va biroz vaqtdan so‘ng ular ajrashib ketgan edi.
Albatta, Charlzning yonida Kamillani ko‘rishlari bilanoq, ommaviy axborot vositalari darhol qizning nomiga turli xil salbiy ma’nodagi fikrlarni bildirdi. Bu vaziyatdan keyin malikani xursand qilish imkoniyati kamaydi. 1971-yilda ular ayrilishga majbur bo‘ldi. Charlz dengiz flotida xizmat qilish uchun ketdi va Kamilla uni kutish befoyda ekanini tushundi, chunki o‘zini unga mos juft deb bilmasdi.
Kamillaning to‘yi
Bunday vaziyatda hech qanday ish chiqmasligini tushunib, (Charlzni onasining irodasiga qarshi chiqmasligini bilar edi), Kamilla 1973-yilda sobiq sevgilisi Endryu Parker-Boulzga turmushga chiqib, Parker-Boulz xonimga aylandi.
Kamilla oila bilan band bo‘lib, Charlzni unutishga umid qilgandi. Biroq uning shaxsiy hayoti bu darajada mukammal emasdi. Endryu xotinboz bo‘lib chiqdi va hatto ikki farzandi tug‘ilgandan keyin ham quyilmadi.
Aynan o‘sha paytda Kamilla va Charlz o‘rtasidagi munosabatlar qayta tiklandi, unga yonida rafiqasini qadrlaydigan erkak kerak edi. Sevishganlar munosabatini sir tutishga muvaffaq bo‘lmadi (yoki ular buni sinab ko‘rmadi), paparatssi ta’qibidan qochib qutila olmadi, ayniqsa hamma uchun Parker-Boulzning oilali ayol ekani juda ham g‘alati tuyuldi.
Charlzning to‘yi
Kamillaning ajrashish uchun ariza berishidan qo‘rqib, saroy ahli shahzodaga kelin izlashni tezlashtirdi. Yelizavetaning tanlovi yosh Diana Spenserga tushdi. Ularning to‘yi butun dunyo tomonidan muhokama qilindi, ammo hamma bo‘lajak qirol sevmasdan turmush qurayotganini taxmin qilgan edi. 20 yoshli Diana ham hali qirollik taklifini rad etish uchun aql va tajribaga ega emasdi. Oddiy qilib aytganda, u Charlzni haqiqatan ham uni to‘ydan keyin sevib qolishi mumkinligiga ishondi.
Diana vafodor rafiqa bo‘lishi, barcha etiket qoidalariga rioya qilishi, taxt uchun merosxo‘rlarni dunyoga keltirishi kerak edi. Afsuski, hech kim uni sevib qolishga va’da bermagan. U Charlz bilan omma oldida o‘zlarini baxtli oiladek ko‘rsatishga muvaffaq bo‘ldi. Ehtimol, shuning uchun ham ko‘pchilik Kamillani ajoyib baxtli oilani vayron qilgan ayol deb biladi.
Afsuski, oradan o‘tayotgan yillar davomida Diananing eri bilan munosabatlari tobora keskinlashdi. Ikkinchi o‘g‘li Garri tug‘ilgandan ko‘p o‘tmay, er-xotin ajrashishga qaror qildi.
Shahzoda Xaygrouv mulkiga ko‘chib o‘tdi va tez orada Kamilla ham tasodifan unga yaqin joyga joylashdi. Charlz o‘zining imkoniyatlari bilan ham hech narsa qila olmadi va na matbuotda ovoza bo‘lishi, na onasining noroziligi, na rasmiy turmush o‘rtog‘ining kechinma va umidsizligi haqida tashvishlandi. O‘sha vaqtda Diana haqiqatan ham bir chetda qolgandi, ammo keyinchalik uning ham atorfida oshig‘lari paydo bo‘ldi.
Bu voqea cheksiz davom etishi mumkin edi, lekin kunlarning birida Diana va uning sevgilisi o‘rtasidagi telefon suhbati ommaviy axborot vositalariga tarqalib ketdi. 1995-yil oxirida Diana BBC kanaliga intervyu berdi va u o‘zining mashhur iborasini — nikohda ular uchta ekanini aytdi. Shundan so‘ng mukammal oila rolini o‘ynash mantiqqa ham to‘g‘ri kelmadi va Yelizaveta II ularning ajrashishiga rozilik berdi. Kamilla esa yuraksiz ayollar safiga qo‘shildi.
Charlz va Kamilla yana birga
Kamilla 1995-yilda eridan ajrashdi. 1996-yilda esa Charlz va Diana ajrashdi. Sobiq juftlik yana topishib, to‘y va baxtli hayotni orzu qila boshladi.
Ammo keyin dahshatli voqea yuz berdi, malika Diana avtohalokatda vafot etdi. Butun Buyuk Britaniya motam tutdi. Buni tushungan Kamilla va Charlz tuzayotgan to‘y rejasini to‘xtatdi.
Rasmiy ravishda, Kamilla qirolichaga faqat 2000-yilda tanishtirildi. Birga yashashga ruxsat olish uchun biroz vaqt kerak bo‘ldi. Shunga qaramay, juftlikka rasmiy tadbirlarda birga chiqish taqiqlandi. Oradan 4 yil o‘tgach, Yelizaveta II o‘g‘liga nikoh uchun rozilik berdi va 2005-yilda ularning uzoq kutilgan to‘yi bo‘lib o‘tdi.
Kamilla Diana bilan bir xil unvonga ega bo‘ldi, ammo inson qalblari malikasiga hurmat tufayli u “Uels malikasi”dan foydalanmadi, unchalik yuqori bo‘lmagan Kornuoll gersoginyasini oldi.
Ajablanarlisi shundaki, bu to‘y 34 yil avval — dramalar, azob chekkan yuraklar va, ehtimol, o‘limlarsiz ham o‘tishi mumkin edi.
Bundan tashqari, Kamilla hech qachon shaxsiy manfaatni ko‘zlamaganligi va, masalan, qirolicha bo‘lishni maqsad qilmagani ham muhim ahamiyatga ega edi. Shuning uchun u, albatta, hammasining o‘z vaqti-soatida amalga oshishini kutdi. 2022-yil 8-sentabrda Yelizaveta II vafot etdi va tojni uning to‘ng‘ich o‘g‘li meros qilib oldi va qirol Charlz III nomini oldi, uning rafiqasi Kamilla esa qirolicha bo‘ldi.
Izoh (0)