Qashqadaryoda pora olmagan profilaktika inspektori mukofotlandi

Qashqadaryoning Chiroqchi tumanida huquqbuzardan 5,5 million so‘m pora olmagan profilaktika inspektori pul mukofoti bilan taqdirlandi. Bu haqda viloyat IIB matbuot xizmati xabar berdi.

Ma’lum qilinishicha, 10-iyun kuni Chiroqchi tuman IIB JXX HPB profilaktika inspektori katta leytenant Nurbek Oqnazarov tumanning tog‘li “Langar” MFYda xizmat olib borayotganida Samarqand viloyatiga tegishli Niva avtomashinasiga duch kelgan.

Avtomashina to‘xtatib tekshirilganda o‘zini B.P. deb tanishtirgan haydovchi tegishli hujjatlari yo‘qligi aniqlangan. Shuningdek, mashinada ikki nafar voyaga yetmagan bola borligi, ular qishloq hududida o‘sadigan “Karrak” o‘simligini yig‘ish uchun yollagani ma’lum bo‘lgan.

Inspektor avtomashinani tegishli hujjatlarsiz boshqarish va voyaga yetmagan shaxslarni majburiy mehnatga jalb qilish holatlari bo‘yicha hujjatlar rasmiylashtirgan. Ish bunday chappasiga ketishini kutmagan haydovchi ishni o‘z foydasiga hal etish evaziga pora taklif qilgan.

Inspektor unga bu ishi jinoyat ekanini, agar niyatidan qaytmasa qonuniy chora ko‘rilishi haqida ogohlantirsa ham, fuqaro unamagan. Natijada profilaktika inspektori bu haqda Chiroqchi tuman IIB boshlig‘i nomiga bildirgi bilan murojaat qilgan.

Holat yuzasidan viloyat IIB, Chiroqchi tuman IIB va prokuraturasi hamkorligida o‘tkazilgan tezkor tadbirda fuqaro B.P. profilaktika inspektori Nurbek Oqnazarov xizmat xonasida 5,5 million so‘m miqdordagi pullarni pora tariqasida bergan vaqtida daliliy ashyolar bilan ushlangan.

Chiroqchi tuman prokuraturasi tomonidan fuqaro B.P.ga nisbatan Jinoyat kodeksining 211-moddasi (pora berish) 1-qismi bilan jinoyat ishi qo‘zg‘atilgan. Pora olmagan inspektor esa pul mukofoti bilan taqdirlangan.

“O‘z xizmat vazifasiga vijdonan va sidqidildan yondashib, korrupsion holatni oldini olgani va fuqarolarda ichki ishlar organlariga bo‘lgan ishonchni mustahkamlagani uchun katta leytenant Nurbek Oqnazarov boshqarma rahbariyati tomonidan pul mukofoti bilan taqdirlandi”, — deyiladi xabarda.

Mukofot sifatida qancha pul berilganiga aniqlik kiritilmagan.