Sentabr oyi boshida Apple kompaniyasi uzoq kutilgan iPhone 14 smartfonlarini taqdim qildi. “Daryo” nashri o‘rtacha har bir o‘zbekistonlik yangi iPhone olishi uchun necha kun ishlashi kerakligini hisoblab chiqdi.
Apple rasmiy saytida iPhone 14 Pro narxi 999 dollardan boshlanadi. O‘zbekistonda esa bu narx yanada yuqori bo‘lishi kutilmoqda.
Davlat statistika qo‘mitasi ma’lumotlariga ko‘ra, 2022-yil yanvar—iyun oylarida O‘zbekistondagi o‘rtacha oylik ish haqi 3,54 mln so‘mni tashkil qilgan.
Demak o‘rtacha maosh oladigan o‘zbekistonlik dam olish kunlari bilan hisoblaganda bir kunda 118 ming so‘m topadi.
Markaziy bankka ko‘ra, 14-sentabr bo‘yicha so‘mga nisbatan dollar kursi 10 940 so‘mni tashkil qiladi. iPhone 14 Pro smartfonining rasmiy narxi 999 dollar — 10,9 mln so‘m bo‘ladi.
Yuqoridagi raqamlarga ko‘ra qilingan hisob-kitoblar o‘rtacha maosh oladigan o‘zbekistonlik iPhone 14 Pro olishi uchun 92,6 kun ishlashi kerakligini ko‘rsatdi.
“Picodi.com” portalidagi ma’lumotlarga ko‘ra, iPhone 14 Pro sotib olish uchun o‘rtacha maosh oladigan turkiyalik 146,7 kun, filippinlik 90,9 kun, braziliyalik 74,2 kun ishlashi kerak bo‘ladi.
Shveysariyada bu ko‘rsatkich 4,6 kunni tashkil qilsa, AQSHda 5,7 kunga, Rossiyada esa 39,7 kunga teng.
Izoh (0)