Moskva, Sankt-Peterburg va Kolpinoning 18 ta turli okruglaridan munitsipal deputatlar Vladimir Putinning iste’fosini talab qilmoqda. Tegishli petitsiya matni Sankt-Peterburg munitsipal deputati Ksenya Torstrem tomonidan Twitter’da e’lon qilindi.
Biz, Rossiya munitsipal deputatlari, prezident Vladimir Putinning xatti-harakatlari Rossiya va uning fuqarolari kelajagiga zarar yetkazmoqda deb hisoblaymiz. Biz Vladimir Putinning Rossiya Federatsiyasi prezidenti lavozimidan ketishini talab qilamiz!”— deyilgan petitsiyada.“Agar siz munitsipal deputat bo‘lsangiz va bizga qo‘shilishni istasangiz, safimizga xush kelibsiz”, — deya murojaatini yakunlagan Torstrem.
Hozirga qadar petitsiyaga 20 nafar deputat imzo chekkan.
8-sentabr kuni Moskvaning Lomonosovskiy munitsipal okrugi deputatlari kengashi Putindan iste’foga chiqishni so‘ragan edi.
Ularning fikricha, Putinning qarashlari va uning boshqaruv modeli “umidsiz darajada eskirgan, Rossiya va uning insoniy salohiyati rivojlanishiga to‘sqinlik qilmoqda”. Shu munosabat bilan moskvalik munitsipal deputatlar Rossiya prezidentidan “o‘zini egallab turgan lavozimidan ozod qilish”ni so‘ragan.
Avvalroq Sankt-Peterburgning Smolninskoye munitsipal okrugi kengashi deputatlari Putindan iste’fo berishni talab qilgan, shu sababli keyinroq politsiyaga chaqirilgan edi.
Izoh (0)