Jahon sog‘liqni saqlash tashkiloti ma’lumotlariga ko‘ra, hozir 2 milliard nafardan ortiq kishining ko‘z kasalliklari hisobiga ko‘rish qobiliyati pasaygan va shu dard bilan bog‘liq nogironligi mavjud. Biroq ulardan 1 milliard nafarga yaqinini jarrohlik yo‘li bilan davolasa bo‘ladi. Toshkentda joylashgan Respublika ixtisoslashtirilgan ko‘z mikroxirurgiyasi ilmiy-amaliy tibbiyot markazi ana shunday murakkab operatsiyalarni o‘tkazish borasida katta salohiyat va tajribaga ega.
Ilgari ko‘z kasalliklarini zamonaviy usullarda davolash borasida imkoniyatimiz cheklangan edi. Shu bois bu yo‘nalishdagi murakkab operatsiyalar uchun ko‘plab bemorlarimiz xorijiy davlatlar klinikalariga borishga majbur bo‘lardi, — deydi markaz direktori Azamat Yusupov.Tibbiyot sohasida islohotlarning yangi davri boshlangach, ilg‘or xorijiy tajribani mamlakatda jadal tatbiq etishga kirishildi. Natijada dastlab mahalliy mutaxassislar tomonidan oftalmologiya sohasiga doir 46 turdagi yuqori texnologik operatsiyani bajarish o‘zlashtirildi.
Muassasaga 5 million dollarlik eng so‘nggi rusumdagi asbob-uskunalar olib kelingach, imkoniyat yanada oshdi. Natijada bu yerda amalga oshiriladigan yuqori texnologik jarrohlik amaliyotlari turi 176 taga yetkazildi. Femtosoniyali lazer yordamida ko‘z shoh pardasi transplantatsiyasi va shoh pardada mavjud astigmatizmlarni olib tashlash, ko‘z tubi patologiyalarida fotodinamik lazer terapiyasi kabi ilg‘or muolaja usullari shular jumlasidan.
Shuningdek, markazda bemorlarga masofadan turib malakali tibbiy maslahat berish maqsadida telemeditsina xizmati yo‘lga qo‘yilgach, ko‘plab fuqarolarning uzoq yo‘l bosib, vaqt yo‘qotib poytaxtga kelishiga hojat qolmadi. Qolaversa, xorijiy davlatlarning yetakchi tibbiyot muassasalari mutaxassislari bilan hamkorlikda yangi texnologiyalar amaliyotga keng tatbiq etib borilmoqda.
Izoh (0)