Liz Trass 6-sentabr kuni rasman Buyuk Britaniya bosh vaziriga aylandi. Trass vazifasiga kirishgach, o‘ziga sodiq konservatorlarni hukumatga tayinlaydi, chunki u zudlik bilan “bugungi kundagi eng yomon iqtisodiy inqirozga qarshi” kurashish rejasini ishlab chiqishi kerak, deb yozadi Guardian.
Trass va uning tarafdorlari g‘alabadan xursand bo‘lgan bo‘lsa-da, bu eyforiya tezda o‘z o‘rnini achchiq reallikka bo‘shatib beradi, chunki mamlakat tanazzul yoqasida, deb ta’kidlaydi nashr.
Guardian nashrining yozishicha, Trassning eng yaqin ittifoqchisi Kvazi Kvarteng uning moliya kansleriga aylanadi. Shuningdek, yangi bosh vazir Svella Bravermanni ichki ishlar vaziri, Jeyms Kleverlini esa tashqi ishlar vaziri etib tayinlashi kutilmoqda. Natijada mamlakat tarixida birinchi marta to‘rtta asosiy davlat lavozimida birorta ham oq tanli erkak bo‘lmaydi.
Gazeta taxminiga ko‘ra, Trassning raqibi va sobiq moliya vaziri Rishi Sunakka yangi kabinetda lavozim berilmasligi mumkin.
Liz Trass o‘zining iqtisodiy dasturi doirasida inflyatsiya va energetika inqiroziga qarshi kurashish uchun 130 milliard funt sterlinggacha mablag‘ ajratishni rejalashtirayotgani xabar qilingandi. Sentabr oyi boshida Trass, agar bosh vazir etib saylansa, faoliyatining birinchi haftasida elektr energiyasi narxi oshishiga qarshi kurash rejasini taqdim etishini aytgan.
Yevropada energetika inqirozi joriy yil boshidan beri davom etmoqda, yozda u rekord darajadagi jazirama va Rossiyaga qarshi sanksiyalar tufayli kuchaygan. Xususan, Britaniyada elektr energiyasi uchun to‘lovlar rekord darajaga chiqdi.
Izoh (0)